Soko醉住開工小儀下「限飲令」

東方日報
參觀酒廠時,兩個大細路擒高擒低,認真百厭。

藝人阮小儀與日籍香港藝人和泉素行(Soko)最近合作主持美酒節目大開酒戒,兩人嘗盡本地各式佳釀,小儀自言雖不懂品酒,卻擁有品酒師的味覺,還自誇從未試過飲醉,並踢爆Soko在節目上試酒後遊魂,險令拍攝暫停。

由阮小儀與Soko主持的香港開電視全新節目《酒勻全香港》將於本月21日起逢星期日晚上10時30分於77台播出,兩人本身是電台拍檔,今次首度在電視合作,他們會走勻全香港的大型酒廠,介紹本土製的特色佳釀,包括花釀氈酒、港式梅酒、鹿茸大補酒、蛇酒、蛤蚧酒、手作啤酒、玫瑰露、威士忌等。

認品酒天才

在節目上,兩人要品嘗不同本地名釀,小儀表示雖不懂品酒,卻有這方面的天賦:「有次喺中環飲日本清酒,我飲到有杧果味,品酒師都畀我嘅味覺嚇親。」她又自誇成世人未試過飲醉酒,反而Soko拍攝期間險飲醉,小儀笑言:「有次Soko試杯好勁嘅雞尾酒,佢竟然一啖飲晒,之後就開始遊魂,幾乎拍攝唔到。我係唔會飲醉,因為每次感到有醉意就會停。」

Soko指自己被團隊限制飲酒,失去了暢飲的自由:「小儀同團隊發現我飲少少酒,廣東話反而變得流利,表現好好,但飲多咗會有反效果,所以佢哋好留意我嘅酒量,唔畀我飲太多。(飲醉咗會做啲咩﹖)有次試過喺小巴窗口落車,大家切勿模仿。」

買蛇酒壯陽

講到在節目內嘗過的芸芸美酒中,小儀覺得白蘭花釀製的氈酒最有驚喜:「我哋落田採花再飲埋花釀氈酒,真係好香。至於蛇酒同蛤蚧酒,我梗係留畀Soko試啦!」又大爆Soko買了蛇酒及蛤蚧酒,Soko說:「之前我睇中醫,佢話我下半身有好多負能量谷住,所以我就諗有壯陽功效嘅蛇酒會唔會解決到我呢個問題囉!」

落場學煮米辛苦到飛起

小儀從前不知香港有如此多高質素的酒廠,證明有很多本土好東西,大家要好好珍惜。釀酒絕非易事,點滴皆辛苦,小儀對悅和醬園在古洞的酒廠的體驗最深刻:「嗰日我哋朝早八點跟師傅學煮米整米酒,要煮熟100公斤嘅米,用一支好似扒龍舟嘅船槳不停將米飯翻動,真係又熱又攰,老闆見我哋咁辛苦,即刻開把大風扇吹住我哋,我哋嘅頭髮吹起晒,好似拍MV咁,畫面勁好笑。」

而Soko對有逾百年歷史、生產五加皮及玫瑰露的永利威酒廠感受最深,酒廠曾經歷過承傳危機,克服重重困難經營至今。

小儀大讚花釀氈酒嗒得杯落。
Soko祖家是日本,當然要認識吓祖家的佳釀。
兩人翻動米飯,辛苦過扒龍舟。