大熱韓片《炸雞特攻隊》進軍荷里活

早2個月全城對「炸雞」狂熱,講緊韓片《炸雞特攻隊》!套戲喺韓國本土破哂紀錄,成為韓國最高入場人次電影,以笑片嚟講的確好威水,其強烈港產片嘅味道亦令佢喺香港獲得好成績,片尾《當年情》一出,香港觀眾即時起哂雞皮!

故事主線講述由5位戇警組成的緝毒小隊,為破案日夜於黑幫對面的炸雞店監視,但案情毫無進展,連炸雞店都面臨執笠。隊長把心一橫,接手炸雞店繼續任務,誰知最廢的組員,竟能炸出食到人黯然銷魂的雞!他們的新店「啃得雞」一夜爆紅,吸引大批食客,舖頭人頭湧湧,日日炸雞炸到手軟,大家完全忘記任務,甚至想轉行炸雞?! 就在此時,案情有新轉機,緝毒小隊其實人人身懷絕技,最後斧底抽薪成功破案!

社會小人物由處處受打壓、被睇低到最後大反轉成為英雄,相信條橋放喺邊個國家,觀眾都會有共鳴︰有邊個唔想自己有出頭天?就係咁,荷里活睇準商機,買下版權準備翻拍!

美國版將由韓國原著CJ Entertainment、環球影業Universal及HartBeat等3間公司共同製作。唔講唔知HartBeat個老闆就係笑匠Kevin Hart,據聞仲係佢促成呢次合作!除咗《炸雞特攻隊》,Kevin Hart早早同CJ、環球影業傾好,將2011年韓片《陽光姊妹淘》改編成荷里活版,叫做”Bye Bye Bye”!

Kevin Hart早前主演嘅《閃亮人生》,改編自法國同名電影,票房口碑亦不俗。Kevin Hart似乎搵到佢嘅致勝方程式,接二連三買下有票房有口碑嘅外語片版權,再將佢地改編成荷里活版。3套電影都有共通點,就係走溫情喜劇路線,唔駛太多CG特技,講人與人相處細膩溫馨感人,成本有限又易引起共鳴。

每年世界各地電影產量咁多,要喺茫茫劇本海入面搵出適合嘅劇本都唔易,Kevin Hart有眼光之餘,都要有好嘅創作團隊配合。《炸》劇本已確定由創作喜劇Girl Trip及Little嘅Tracy Oliver負責,唔知美版仲會唔會有嗰浸80年代港產片味呢?