4 .5億鉅製 後期做足一年!古天樂落本撐港產特效片《明日戰記》

講開科幻特技電影,通常第一時間諗起荷里活出品、一系列超級英雄、sci-fi片畫面水準極高有幾像真。不過畫面做得再靚,故事唔掂都無用,好似國產大片《流浪地球》,視覺效果算見得人,但故事情節瑕疵不少,上面收幾十億,香港觀眾就似乎唔多領情。

香港出品嘅特效片你又點睇呢?由籌備、拍攝到後製足足用咗4年嘅《明日戰記》,故事發生於2055年,地球深受污染及全球暖化等問題困擾,再加上受到外星生物入侵,由古天樂、劉青雲、劉嘉玲、姜皓文、謝君豪等人組成嘅拯救隊展開救援行動。

電影詳細資料要再等下先知,不過《明》曾經用過《矛盾戰爭》呢個片名,睇埋預告片,故事似乎有唔少懸念︰為咗打退外星人,要犧牲16萬人?張家輝所代表嘅「天幕」,係忠定係奸呢?

有外星生物自然有高科技戰車、戰機同戰衣,預告片所見美術、動作設計、畫面都做得非常出色!《明日戰記》投資高達4億5千萬港元,導演吳炫輝解釋CG特技做得好,除咗預算充足外,時間足夠都好關鍵︰實景搭足2個月,後期製作做咗足足1年!吳炫輝今次首次執導,不過本身大有來頭,佢專長於視覺特效,3次獲得香港電影金像獎「最佳視覺效果」(《風雲II》、《投名狀》、《鬼域》),憑《投名狀》獲台灣金馬獎、亞洲電影大獎頒發「最佳視覺效果」大獎。

古天樂對推動香港影視產業不遺餘力,參與演出外,佢間公司「天下一」亦有份投資及發行。一向鍾情科幻片嘅佢希望可以借《明》証明香港有人才,有國際級數CG技術,非常有心!唔係靠把口得個講字,古生係真正幫到香港電影業!

click呢度睇預告片