【為了靚靚】 內地網紅花930萬變范冰冰

近日就有一名內地女子「小張」到醫學美容診所,願意支付約10萬人民幣(約11萬5千港幣),希望可以擁有Angelababy嘅眼睛及迪麗熱巴嘅鼻。院方梗係好爽快咁答應佢,仲同佢講只要肯俾錢就得。可惜手術後結果不似預期,令小張好失望,連佢啲同事都問佢啲錢使咗去邊,一啲效果都冇。

院方當然保護自己,同小張講因為而家係喺恢復期,所以效果冇咁明顯。之後仲話如果恢復期後仲係唔似預期,佢哋會幫手修復。小張就話就算院方俾幾多年時間都冇用,都唔會恢復到自己想要嘅樣,佢更希望院方會退回手術費,但當然,院方梗係唔會回應啦!

一個整完又到另一個,整容真係會令人上癮,能夠整到明星樣確係令人心動!曾參加歌唱選秀節目《超級女聲》嘅內地網紅何承熹,係網民熱門討論人物。點解?因為佢擁有一個好似范冰冰嘅樣。因為何承熹好欣賞范冰冰有精緻嘅面孔,所以佢由15歲就開始整容,用咗8年時間,仲花費800萬人民幣(約930萬港幣)!

自己整得滿意之後,佢仲幫埋身邊人,當中包括佢老公同埋好朋友,實行齊齊大變臉。佢用咗15日將好朋友整到成個迪麗熱巴咁,而佢老公余小泉都同樣擁有「網紅臉」,雖然變成靚仔靚女,不過佢哋兩個塊面都離唔開「膠面」。不過,佢哋仍然會係自家整型醫院嘅代言人,正所謂:「沒有最膠只有更膠」,相信佢哋嘅整型醫院會一直有生意。