新片導演涉性侵 「印度良心」Aamir Khan 唔怕蝕本叫停拍攝

去年因為影壇知名製作人Harvey Weinstein性侵案而引起廣泛關注的「MeToo運動」,亦因此揭出社會上很多醜陋地以權謀私嘅性侵問題。

最近「MeToo運動」於印度寶萊塢發酵,喺男女唔平等嘅社會,受害人申訴變得更困難,一眾有影響力人士嘅支持變得尤其重要。有「印度良心」之稱嘅Aamir Khan同太太Kiran Rao再次挺身做好榜樣,佢地共同成立嘅製作公司最近出左個聲明,講明對所有性侵事件零容忍。

點解發聲明?因為佢地公司有份投資嘅愛情喜劇 《Housefull 4》,導演被女演員指控涉及性侵。因為事件進入法律程序,無開名公布誰是涉案者,不過警方已經受理就案件展開調查。

Aamir Khan不負「印度良心」之名,於聲明中表明立場「對性侵事件零容忍,並予以強烈讉責,至於對惡意掐造嘅指控我地一樣零容忍」,仲唔止得個講字,堅有實際行動,就係即時叫停《Housefull 4》嘅拍攝,直至另行通知!咁做隨時蝕好多,但因為佢相信創作人有社會責任,拍戲唔只止搵錢咁簡單。

Aamar Khan除咗係印度天王級影帝,本身亦以身作則打破唔少社會禁忌,例如年輕時不理家族反對、跨越宗教迎娶第一任太太;善用自己名氣主持節目《Satyamev Jayate》,討論印度貧窮、醫療、種姓制度等等不公問題。當然仲有製作出一套又一套跨越地域、感動不同國家觀眾嘅電影,包括於香港創下票房佳績、反思何謂教育嘅《打死不離3兄弟》、講述父女情及性別不平等嘅《打死不離3父女》、討論宗教迷信嘅《來自星星的PK》等。

「MeToo」運動俾勇氣受害人講出自己嘅傷痛,藉以制裁施暴者,好似影壇大亨Harvey Weinstein以自己於影壇嘅權力,多年來威迫侵犯一眾女星及工作人員實在可惡,其電影公司雖然出品多部奧斯卡最佳電影,不過佢充其量只係生意佬同製片人。公司「The Weinstein Company」因為佢嘅惡行已經宣告破產!

當然,亂用「MeToo」作不實指控嚟轉移視線、搶眼球搏新聞版面,都一樣不能原諒,一樣咁可惡!