【繼續炒冷飯】無綫舉行台慶亮燈儀式 嚟緊有咩劇集同綜藝節目睇?

無綫噚晚舉行 《TVB 50 + 1周年再出發》亮燈儀式,3套台慶劇《跳躍生命線》、《是咁的,法官閣下》及《兄弟》演員,及8個綜藝節目主持都有現身造勢。每一年亮燈儀式嘅亮點就係藝人企位,邊位得寵睇排位就知道,除咗地位崇高嘅汪明荃企最前中間位置之外,第一排仲有視帝王浩信、視后田蕊妮、蕭正楠、朱晨麗、馬德鐘、黃智賢、楊明、張振朗、湯洛雯、麥明詩及馮盈盈。今年有唔少一線小生花旦缺席,星光較往年黯淡,所以唔少藝人都升呢企前排。

咁除咗播映中嘅《跳躍生命線》及《嫁到這世界邊端2》之外,嚟緊仲有邊啲劇集及綜藝節目將會陸續出街呢?台慶劇集方面,由王君馨、黃智賢及關禮傑主演嘅法律劇《是咁的,法官閣下》將於10月29日首播及由王浩信、楊明、伍允龍、朱晨麗、江嘉敏及劉穎鏇主演嘅動作警匪懸疑劇《兄弟》將於11月12日首播。

至於綜藝節目方面,分別有《學是學非》、《兄弟姊妹去旅行》、《阿爺廚房》、《肥媽優質食好D》、《周遊東京2》、《女人四十》及《美女廚房》地獄廚神絕地反擊及美女廚神終極挑戰。

除此之外,big big channel亦悉心炮製咗嘅由Bob、簡淑兒、丁子朗、Joe Junior等主演嘅網劇《我老細唔係人》,網劇以辦公室為背景,講述職場生態。

網民紛紛留言「愈嚟愈慳皮」、「啲綜藝節目大部分都係翻炒」、「全部都係舊嘢再拍」、「老土到震」、「成班j2都唔知跳乜」、「節目慘不忍睹」及「執左佢算喇」等等。唔少網民都表示淨係對《女人四十》同《學是學非》有興趣,唔知大家又最想睇邊個綜藝節目呢?