Model王丹妮越級挑戰 拍《梅艷芳傳奇》

安樂電影公司將開拍「香港的女兒」百變天后梅艷芳嘅傳記片-《梅艷芳傳奇》,由《寒戰》導演梁樂民執導。

《梅艷芳傳奇》據聞會由梅姐童年拍起,由佢4歲同姐姐一齊於歌廳賣唱,到佢19歲贏得新秀冠軍,再一步一步成為亞洲天后嘅故事。梅姐除左歌唱事業輝煌,演戲事業同樣出色,早於87年憑《胭脂扣》贏得金馬獎、香港電影金像獎及亞太影展最佳女主角,及後嘅電影作品《審死官》、《男人四十》、《慌心假期》等等同樣獲得不少金像獎提名。

至於最多人關注,由邊個演梅姐?答案就係模特兒王丹妮(Lousie)。睇返資料,Louise無咩演戲經驗,不過行天橋嘅資歷就好豐厚,行過米蘭、日本嘅天橋。導演話,睇中Louise嘅個人經歷,能夠帶出梅姐嘅滄桑感。

扮演傳奇人物,如何入型入格又入骨,但又唔係一味模仿得個殼,少啲功力都搞唔掂。今次難度再高啲,除咗因為梅姐的聲音、氣場、台型都獨特兼有氣勢外,最難是梅姐唔似其他奧斯卡攞獎片大熱的歷史人物,其事業人生高峰(8、90年代)仍然同我地好貼近,活現喺我地的腦海入面,即係每個觀眾心入面都有一個「梅姐概念」,你話係咪難度再升呢先?

對演戲經驗尚淺、外型亦唔係十足似梅姐嘅Louise,唔止係「考牌之作」,呢鋪直情係「得就得,唔得就瓜得」。不過當年李安執導《色戒》,湯唯都係以半新人姿態擔正,結果咪一片彈起,唔驚嘅。

梅姐嘅歌唱事業精彩、人生曲折起伏,確係拍電影嘅好題材,我比較好奇電影取態會係描述梅姐嘅事業,定係舞台下私人感情一面?梅姐在公在私嘅戰友,粒粒天王巨星:張國榮、張學友、劉德華,仲未計成班徒弟!唔知班戰友會係友情客串,定係由其他演員扮演?抑或由真實片段穿插?淨係諗起如果戲份需要,要搵人飾演哥哥,都戥導演頭痕。

仲有,梅姐有一件為人津津樂道嘅事,就係盛傳佢89年喺民運營救學運人士嘅「黃雀行動」入面出錢出力,甚至拒絕北上工作。呢一段,喺現時大氣氛同內地票房考量上,又會唔會講?

《梅豔芳傅奇》故事如何取捨、演員能否在大銀幕上重現風華,種種元素都有甚高難度,再加上仲有強調自己擁有「梅艷芳」商標嘅梅媽,話會睇完故事先考慮做電影嘅顧問,都令呢部戲有更多懸念。