Marvel大晒冷 梁朝偉殺入新片《上氣》演奸角 雷神第4集後年上映

自《復仇者聯盟4終極之戰》後,一眾影迷極度關心漫威宇宙嘅動向,Marvel亦好識做,剛剛喺美國聖地牙哥舉行嘅大型動漫展Comic-Con International: San Diego (SDCC)度哂冷,連同一眾導演同演員齊齊宣佈漫威宇宙第4階段有咩搞作!

電影方面講咗好耐嘅《黑寡婦》終於有片期,將於明年5月1日上映。除咗女主角Scarlett Johansson之外,仲有《怪奇物語》嘅警長David Harbour、Rachel Weisz主演,並由《顫慄柏林》導演Cate Shorthand執導,有出席記者會嘅Scarlette仲話因為「黑寡婦」角色立體又多面向,如果唔係做唔到10年咁耐!

到下年仲有《永恆族》,單就演員陣容嘅傳聞已經夠哂話題性。今次終於確定由Angelina Jolie飾演Thena、《內政保鑣》男星Richard Madden飾演Ikarus、Salma Hayek飾演Ajax,同我地好熟悉嘅韓國演員《屍殺列車》「馬可愛」馬東石將會演出Gilgamesh一角。

去到2021年就有《奇異博士》續集同《雷神奇俠4》,《奇》續集個片名都幾複雜,叫Doctor Strange in the Multiverse of Madness ,今集仲會加入紅女巫坐陣。2個角色都唔係埋身肉博類型,成套戲會唔會不停睇住佢地用手畫咒語比圈圈?導演Scott Derrickson就講明新作會更貼近《奇》漫畫世界,比前作黑暗,分分鐘會成為MCU第一套恐怖片!

而《雷4》確定由Taika Waititi負責編劇及執導,仲落實Natalie Portman回歸做女雷神,佢喺記者會攞住個雷神鎚出場時,全場起哄!今集仲有個好搞鬼嘅片名Thor: Love and Thunder,怕且會發展雷神同Jane條感情線,Waititi接手《雷神奇俠:諸神黃昏》後,雷神一角瘋狂咗仲fun咗,好期待第4集有咩新嘢玩!

最驚喜應該係記者會尾段,宣佈重啟《幽靈刺客》,並由憑《月亮喜歡藍》、《綠簿旅友》獲得2屆奧斯卡最佳男配角嘅Mahershala Ali主演。不過對香港觀眾嚟講,可能《上氣》(Shang-Chi and the Legend of the Rings)嘅選角更驚喜!

《上》作為Marvel首部華裔超級英雄電影,電影公司要求男主角係華人、識功夫同操流利英文。就住呢啲條件,網友推選彭于晏、韓團GOT7成員王嘉爾、內地演員黃景瑜、《從前,有個荷里活》入面演李小龍嘅Mike Moh同參與過《水行俠》嘅Ludi Lin,仲有傳過「宇宙最強」甄子丹會演出其中一個角色。

結果以上人士全部無份,男主角鐵定由加拿大華裔演員Simu Liu擔任。Simu演藝資歷唔長,主要演加拿大電視劇,包括Blood and Water及處境喜劇Kim’s Convenience。雖然作品唔多,不過憑大隻身型、陽光笑容入選過Hello!雜誌嘅「50位最美加拿大人士」,入行短短6年已經躍升成MCU一員,實力不容少覷!

最估唔到既仲有我地嘅「電眼影帝」梁朝偉亦會加入漫威大家庭,於《上》飾演奸角滿大人(Mandarin)!《鋼鐵奇俠3》曾經出現過冒牌滿大人,今次由梁朝偉飾演,個造型應該會靚仔好多啩?《上》暫定2021年2月上映。