HBO好眼光 《上流寄生族》攞獎前買入版權拍劇 搵Tilda Swindon演窮媽媽

荷里活呢排最熱話題一定係南韓電影!自從奉俊昊嘅《上流寄生族》獲得奧斯卡金像獎最佳國際影片、最佳原創劇本、最佳導演及最佳電影4項大獎,破哂韓片紀錄,成為92年嚟首部非英語片贏得最佳電影殊榮後,美國媒體不停出「必睇南韓電影」名單,其中有好多戲香港觀眾一早識欣賞,好似朴贊郁導演嘅《原罪犯》等!

好電影值得傳頌,多啲人識睇會睇固然係好事。不過荷里活都有舖趁熱改編癮,好鍾意買個劇本返嚟拍荷里活版,翻拍結果有好有壞,好似港產片《無間道》被馬田史高西斯翻拍成《無間道風雲》,攞到奧斯卡最佳電影,算係成功例子。亦有荷里活版《原罪犯》,由「魁隆」Josh Brolin及「紅巫女」Eilzabeth Olsen主演,但係拍完都無人知。

仲有翻拍日本《午夜凶鈴》及《咒怨》,分別搵咗當時得令嘅Naomi Watts同Sarah Michelle Gellar主演都幫唔到幾多,評價遠遠不及原作!今次《上流寄生族》唔係翻拍荷里活版,而係由HBO製作,導演奉俊昊親自監制,將《上》改編成6個小時電視劇!

HBO獨具慧眼,於《上》未攞奧斯卡前已購入電視版權,依家咁有威勢當然可以加大製作。據外媒Vogue及NME報導,代表下層窮人嘅金家夫妻,好大機會由「變型俠醫」3屆奧斯卡最佳男配角提名嘅Mark Ruffalo及「古一」Tilda Swinton飾演,Tilda Swinton早於《末日列車》同奉俊昊導演合作過,成數極高!

雖然cast吸引,不過電視版由南韓改以美國為背景,荷里活改編外語劇本,少有超越原著,電視版仲要成個文化背景唔同哂,難免令人擔憂成果不倫不類!雖然奉俊昊會親自參與,HBO仲搵埋金牌製作人《為副不仁》、《沽注一擲》嘅Adam McKay共同監製,電影版珠玉在前,要拍得好都幾高難度!

奉俊昊導演對於電視版開拍則顯得雀躍,表示有更多篇幅可以講故事,好似片中前一任管家雨夜造訪朴家時,塊面瘀成一撻撻,電影中嘅佢始終無解釋傷痕何來,電視版就有空間補返細節。唯有相信奉導應該會睇實自己作品,唔會由荷里活亂改一通啦!