【full咗喇!】森美帶團遊日本 團費平過杜如風10萬

一向喺電台帶俾人好多歡樂嘅森美,今次衝出電台同電視台,將會喺下年農曆年期間,做星級導遊帶團去日本四國!

自從旅遊節目《森美旅行團》播出之後,森美繼杜如風後成為第二位日本達人。佢喺節目中帶住幾位靚女喺東京大玩特玩,不過同杜如風唔同嘅係森美比較著重去大自然景點,加上鍾意參與當地特色祭祀慶典等,聽落好似有深度好多。

森美呢個旅行團只有一團,不過價錢就相宜好多,只需每位$15,888。當中已經包括來回機票、3晚溫泉酒店及每日3餐,仲包晒景點門票。價錢相比起之前杜如風搞嘅、團費$118,888嘅東京6日團,就真係貼地好多。

而且杜如風團主力sell吃喝玩樂,相反森美團就sell四國秘景,走文化深度遊路線,仲會一路行一路同你講解歷史資料。另外亦會帶你親身體驗整烏冬、鳴門大橋漩渦、跳傳統阿波舞等,機會比起東京shopping同埋食懷石料理更難得!唔怪得知森美都搞笑咁話如果冇咁上下修養嘅話就唔好跟佢團喇。

而一向親民嘅森美講到明會整整跟足4日,仲保證每次搭車都一定會唱一首歌。最正係浸溫泉嘅時候,佢會毫不吝嗇地open佢副fit到漏嘅Body陪大家一齊浸!咁有誠意,想唔俾多啲Tips呢位導遊都唔得啦!

價錢相宜咁多,又有得同森美大哥周圍去玩,唔怪之得呢個團已經full咗。森美喺社交網站話因為太多人報名,所以個團喺今朝早十一點一開賣就爆咗。唔少網民都留言叫佢加團。

不過始終每個人對旅行嘅要求同荷包嘅深淺程度都唔同。如果有得揀,大家又會點揀呢?