Eason榮幸涉抄:終於我有份!

東方日報
Eason為新碟舉行分享會,獲張敬軒現身撐場。

陳奕迅(Eason)在新碟活動上,回應新作有抄襲之嫌時相當反高潮,除直認「旋律幾乎一樣」外,更自覺是褒多過貶,要講多謝!至於巡唱的紀錄片,睇足四次仍有笑有淚,連張敬軒也支持,但自爆妻女卻零興趣。

前晚Eason舉行《L.O.V.E. in F.R.A.M.E.S.》放映及分享會,記載他與其DUO團隊的世界巡唱幕後花絮及灌錄《L.O.V.E.》大碟的製作過程,吸引張敬軒及大批歌迷捧場。問到由他作曲的新碟主打歌《可一可再》,被指旋律跟韓國歌手尹鍾信的《一月到六月》相似,他坦言曾聽歌求證,亦承認:「尤其第3句嘅旋律係幾乎一樣。」但否認抄歌:「之前係冇聽過呢首歌,寫完首歌以為似另一首英文歌,咁音符都係得12個,我哋唔係抄佢,我自己知咪得囉。」更搞笑說:「我係咪應該覺得榮幸?終於我有份,多謝!」

翻睇爛gag唔過癮

他又指睇紀錄片睇足4次,次次都有笑有淚、有不同感受,惟有一樣沒變:「唔係咁鍾意見到自己講嘢,有啲嘢唔係咁同意,我有啲搞笑位依家睇番唔覺得好笑。」問到老婆徐濠縈及囡囡可有睇過?他說:「老婆冇興趣睇,阿女忙緊考試!(咁冇興趣?)唔係,就好似我早前睇咗樂隊QUEEN改編嘅電影,睇完覺得好感動,我想講嘅係有時做音樂唔一定會即刻令人明白,樂迷鍾唔鍾意,每一個評論同批評我哋都會聽,當然有時覺得唔好嘅係有啲字眼太攻擊性。」至於已故歌手盧凱彤亦是DUO成員之一,他直言至現時仍掛住對方。

徐濠縈跑步擦傷

此外,向來是跑步「發燒友」的徐濠縈,昨日跑步時不慎擦傷手腳,並在社交網晒出相片,留言:「我真的受傷了,跑往淺水灣途中在修路的地方不小心跌倒!感謝救護站的救護員幫我清潔傷口,我先可以繼續跑!」她又指今次並非首次弄傷,難怪不少網民叮囑她跑步時要小心,更笑言會弄花其靚指甲。

貪玩的Eason在現場的布景板上,破海報而出,相當搞笑。
徐濠縈昨日在淺水灣練跑時不慎仆倒,跌到滿手傷痕。
徐濠縈感謝救護員幫忙。