DC 冇運行? 小丑女新片出師不利衰咩?

DC漫畫改編嘅《自殺特攻:超能暴隊》大收旺場,小丑女爆紅跑出成為當年萬聖節最多女生模仿對象。不過以小丑女孭飛嘅新片《猛禽暴隊:解瘋小丑女》就出師不利,美國開畫周末票房錄得3300萬美金,遠低於預期嘅4500萬美金,成為DC超級英雄系列電影最低開畫電影。本土票房不過不失,海外市場表現唔錯,可惜亞洲地區又受疫情影響,大大影響入場人次,想幫都幫唔到幾多,到底套戲出咗咩事?

由Margot Robbie飾演嘅小丑女Harley Quinn於2016年《自殺特攻:超能暴隊》首次登場,《自》當時雷聲大雨點少,宣傳力度亦相當強,cast亦唔弱,有Will Smith又有Jared Leto飾演小丑Joker,滿心期待結果套戲劣評不斷,開畫票房係威係勢,不過第2個星期票房走勢直線插水。鑑於《自》負評嚇怕唔少影迷,外界都對《猛禽暴隊:解瘋小丑女》抱觀望態度。

奇就奇在既然前車可鑑,出品商華納自《自》後對改編DC系列上萬二個心,後來嘅《神奇女俠》、《水行俠》都做得有聲有色,連超黑暗嘅《小丑Joker》都破哂R-rated電影(相等於香港三級電影)票房紀錄,評價相當好,男主角Joaquin Phoenix橫掃各大男主角大獎,連奧斯卡都袋埋,破哂超級英雄片紀錄。照理摸出成功方程式,偏偏到《猛禽暴隊:解瘋小丑女》又突然還原基本步,宣傳都唔識做咁!

美版海報

最錯就係電影公司自己對套戲無信心。今次搵咗新晉華裔導演Cathy Yan執導全女班電影,事實上《解瘋小丑女》一啲都唔差,美國口碑唔錯,但可能導演資歷尚淺,華納對媒體落封口令,上畫前3日先可以出影評同講套戲枝枝節節,結果幾好評都散唔切,依家唯有寄望套戲憑口碑慢慢撐返起個票房。搵得新人嚟拍就對人地有信心啦好心!

仲有就係宣傳擺錯重點。小丑女呢個角色同《小丑Joker》、《神奇女俠》唔同,唔算家傳戶曉,之所以彈起獨立成篇,全靠Margot Robbie於《自殺特攻》亮眼表現跑出。除咗知佢俾小丑搞到癲癲地之外,對佢認識不多,本來大好機會幫小丑女建立角色故事,好好舖路變成另一個「神奇女俠」,但搞笑地明明係主角擺到佢變女團其中一員,硬要變成一堆女人群戲。原裝片名水車春咁長叫《Birds of Prey(and the Fantabulous Emancipation of One Harley Quinn)》,可惜其他角色比Harley Quinn更生面口,開畫見唔掂先急急腳改片名,以小丑女擔正《Harley Quinn: Birds of Prey》!

港版海報

美國改片名本來對國際市場影響唔大,因為去咗外地,唔同國家根據自己語言起片名。以香港為例,雖然跟跟地原裝片名,不過「猛禽暴隊」呢類文字組合年中見唔少,變相同無講過無分別。電影自動變成《小丑女》,港版海報小丑女都突出過美版,定位清晰明確,可惜敵不過武漢肺炎,幫唔到幾多票房!