Christian Bale過檔Marvel 《雷神4》隨時有齊影帝影后

外媒Collider率先透露,曾經主演蝙蝠俠嘅男星Christian Bale,好大機會加入Marvel大家庭,於《雷神奇俠4》亮相。消息旋即引起網民暴動,今日仲得到荷里活影壇權威雜誌The Hollywood Reporter証實有關傳聞!似乎Marvel電影宇宙越嚟越勁無敵手!

Christian Bale將會飾演邊個角色暫時未有公佈,估計會係被奧丁收埋嘅其中一個神,亦有唔少人估佢將會出演俗稱馬面雷神嘅Beta Ray Bill。因為呢個角色喺上一集《雷神奇俠:諸神黃昏》中嘅彩蛋登場,無論佢飾演邊個角色,相信Christian Bale嘅加入令《雷神》系列更加吸引。

Bale係近年最成功嘅蝙蝠俠,無咗由佢飾演、Nolan執導嘅《蝙蝠俠》,成個DC系列失色不少。近年靠水行俠、神奇女俠先挽救返啲人氣,佢無演蝙蝠俠之後亦刻意無參與任何漫畫系列電影,今次轉投Marvel懷抱,的確有驚喜!

今集《雷神》除咗Christian Bale似乎仲會加入新角色, Marvel總裁Kevin Feige上月出席活動時就透露咗MCU將會加入首位跨性別超級英雄,令整個系列更多元,更早於上年7月已經進行選角,要求必需為20至30多歲嘅變性人。外娛推測新角色應該為天使Sera無誤,佢係Marvel漫畫中唯一跨性別角色,本為男性後轉為女性,與雷神同屬天界嘅佢仲係雷神個妹Angela嘅戀人!

《雷神》自上集由《陽光兔仔兵》導演Taika Waititi接手後成個生猛哂,有人性有啤酒肚嘅雷神勁搶戲,所以越拍陣容越勁。《雷神4》飾演Jane Foster嘅Natalie Portman會回歸外,有傳飾演邪惡家姐Hela嘅Cate Bianchett亦好大機會回歸。再加埋Christian Bale,《雷神4》會唔會成為最多影后同影帝嘅超級英雄電影?