【Chok到呢】謝霆鋒大晒廚藝 大師級表現笑爆網民

藝人謝霆鋒人稱chef lé mon煮餸煮到出神入化就係人都知,近年主持飲食真人騷《12道鋒味》更轉攻飲食界。前日澳門有酒店邀請咗佢出席米芝蓮晚宴,霆鋒要係7位國際名廚面前炮製一味精緻美味甜品「玫瑰泡芙及荔枝啫喱」。身位世界首位米芝蓮之友榮譽星廚師嘅霆鋒喺班名廚面前一啲都唔驚,仲一如以往咁Chok爆整甜品。片中霆鋒好似乩童上身,不停抽畜咁擠朱古力醬同白色醬落個餐盤到,最後仲好型咁頭也不回行離張枱,雖然佢好認真咁畫,但藝術嘅野真係唔係人人識欣賞。嗰一幕就好似當年星爺喺《食神》中彩虹鮮花拔絲嘅廚法。

對於霆鋒大師級嘅表演,一班網民都話:「好好笑」、「做咩野啊佢」、「想睇個完成品」、「在場職員差啲要揾龍哥幫拖」、「將螳螂拳發揚光大」、「輸人唔輪陣,唔食得都睇得!」,亦有網民話霆鋒擠到成枱成地都係朱古力醬,辛苦班清潔姐姐。

喺今朝,黃秋生喺社交網站上載一條拎住兩支化妝掃幫人化妝嘅片,唔少網民已經一眼認出佢係到模仿緊霆鋒,網民仲留言話佢好好笑同抽水抽得超快:「秋生哥好型」、「維多利亞港都被你抽乾」、「好鬼正」、「米芝蓮化妝師」、「完美演繹」等等。