Celine《全美一叮》再遭Mel B狠批指太誇張

來自香港9歲嘅「小巨肺」譚芷昀(Celine)喺香港時間今日繼續喺《全美一叮》(America’s Got Talent)亮相,仲要同天敵「小雲妮」Angelica Hale同組,真係極富娛樂性。而今次結果亦會十分殘酷,因為喺11個參賽者當中,今次就只得5個可以晉身決賽。而當中亦不乏其他顯眼童星,就好似同樣都係以唱歌參賽嘅Christian Guardino、以跳舞做賣點嘅Merrick Hanna等亦都係今日一齊爭出線。

講返Celine,今次佢繼續賣童真,揀咗唱迪士尼動畫《魔海奇緣》(Moana)嘅主題曲《How Far I’ll Go》。一班評審Simon、Heidi、Howie都讚Celine表現好好,就連一向挑剔嘅Simon仲話佢表現好到難以置信,相信連佢個仔都會鍾意咁話。而Heidi就繼續話佢好Cute,Howie就話希望佢可以繼續晉級。

不過���外一名評判Mel B就指Celine雖然準備得好好,但係表現得太誇張,搞到好似唱歌劇咁。技巧雖然無得彈,又識升key時低音亦唱到,不過就覺得呢種唱法唔適合佢嘅年紀。(咦?點解咁似網民同Erick Kwok講嘢嘅?)

後來,主持Tyra問Celine最大嘅夢想係咩嘅時候,Celine就話自己好想贏到《全美一叮》同埋見到偶像Celine Dion。

喺比賽完結之後,Celine亦有喺Facebook呼籲大家記得投票俾佢,幫佢夢想成真。可唔可以成功出線就要等美國居民網上公投,香港觀眾只好喺網上幫佢打打氣啦!