3對CP齊集食海膽!單身胡定欣慘變電燈膽

胡定欣快啲搵番個人啦!

藝人袁偉豪(Ben)同女友張寶兒(Bowie)、尋晚相約一班好友食飯,包括單立文(豹哥)同太太胡蓓蔚、陳山聰同太太何麗萍(Apple),成雙成對加上一個「電燈膽」胡定欣。Ben喺社交網分享大合照,相中可見,上月宣布佗B嘅陳山聰同Apple坐喺中間,Apple着黑色鬆身衫遮住孕肚,見佢精神唔錯!

佢哋咁齊人當然要食好嘢啦,見Bowie將半板海膽撈落碟意粉上,仲大嗌:「正呀!」坐喺隔籬嘅Ben即刻問:「你講我呀?」一班女士見到碟海膽意粉,興奮到不停歡呼,連豹哥想講嘢都被老婆制止:「你唔好嘈住,老公!」,仲問Bowie:「張寶兒食咗落去,聽日跑幾耐?」Bowie回答:「聽日唔坐得呀!」認真勤力!

Apple穿上鬆身衫遮孕肚。
張寶兒大嗌海膽好正!
成板海膽倒落去。
食完冇得坐一日都抵啦!