3月宣傳聖誕新戲?鬼叫佢係男神咩!

講緊由班尼狄甘巴貝治(Benedict Cumberbatch)聲演嘅《聖誕怪怪傑》,無錯係聲演!男神以超班演技實力起家,以BBC劇集《神探福爾摩斯》演活怪雞神探,憑實力成功改寫性感男人嘅定義。喂,呢啲舊聞來架喎?無,想提下大家男神今次用把聲都夠行走江湖,引起巨大關注啫。

班尼狄一向有把靚聲,偶爾為慈善講故仔聽到一班fans暈得一陣陣,佢其實仲好鬼馬,最叻扮已故影星「石內卜教授」阿倫力文(Alan Rickman),仲搞鬼地喺《阿森一族》為石內卜教授配音。

為電影配音班尼迪可謂駕輕就熟,前有《荒失失企鵝》入面其中一個角色-隻狼Classified;

再前前作有配音之餘兼做埋表情動作模擬CG嗰part嘅《哈比人- 荒谷魔龍》、《哈比人:五軍之戰》條噴火龍。當時不少宣傳花絮都著墨於班尼狄嘅肉緊過人,表情動作聲音全部做足兼有突,令條CG龍有血有肉!

配音一定難唔到男神,不過配得咁重戲份,《聖誕怪怪傑》呢個躁底又孤僻、表面兇狠內心溫柔嘅角色就係第一個啦。

男神除左做戲了得,熱心公益仲好玩得。之前客串笑片《非常索凸務 2》(Zoolander 2)就出咗個非常驚喜(定驚嚇?)嘅look:

不過最受迷妹喜愛嘅,應該唔係佢嘅電影角色,而係上英國名嘴Graham Norton節目時扮嘅水獺:

《聖誕怪怪傑》要到年尾先有得睇,各位迷妹最快都要到4月睇《復仇者聯盟3無限之戰》,睇Benedict喺入面做奇異博士,先有得止渴!起碼好過等睇新一季《神探福爾摩斯》,唔知等到幾時!