28樓天台追賊 陳展鵬半天吊腳震

東方日報
陳展鵬在28樓天台追賊,有吊威吔啫,但睇見都牙煙!

陳展鵬與黃智賢前日為無綫劇《逆天奇案》開工,拍攝天台捉賊戲,要在樓高28層的天台追逐,雖然做足安全措施有吊威吔,但見展鵬有些膽怯,受訪時他承認「驚驚哋」:「年紀大畏高,雖然試過係安全嘅,始終喺28樓邊緣太高。(已為人父錫身?)唔會,想突破吓,但發覺自己體能冇以前咁好,要操Fit啲,鞭策自己勤力啲。」

早前展鵬公開一段為B女剪臍帶的片,他直認「唔知點剪」亦怕剪到BB。又笑言B女比較慢熱,需要多點互動:「佢已經認得我,但想佢叫媽咪先。(單文柔幾時復出?)我哋結婚唔夠兩年,身份就轉變咗,佢忙住適應湊BB,分身不暇,暫時做住KOL。」至於黃智賢對於陳煒被指與男友同居試婚,他笑言是正常情侶發展的階段:「冇問過佢,唔想似八公咁,我有見佢,覺得佢好開心,佢係冠軍中嘅冠軍,人靚心情又靚。(做定人情?)隨時Ready。」

黃智賢成個幹探咁款。