28年倉底劇重見天日!黎明擔正《晉文公傳奇》深夜時段出街

無綫每年拍攝多部劇集,但有部分劇集會因為各種原因,只係喺海外市場或者收費台播出。好似《蘭花劫》就喺倉底擺咗十年,先正式喺翡翠台出街。就算神劇《天與地》都要擺咗兩年先播。唔係每部倉底劇都咁好彩可以重見天日,有啲劇可能永無見天之日。

網上有消息指,TVB將會安排28年前倉底劇《晉文公傳奇》,喺下年1月初深宵時段緊貼《壹號皇庭V》播放。《晉文公傳奇》由黎明、羅慧娟、郭秀雲、及歐陽震華主演,於1989年拍攝,不過一直都冇喺免費電視頻道播放,只係出咗DVD同埋向海外發行。

拍攝《晉文公傳奇 》時黎明只得23歲,劇照中睇到當時嘅黎明非常青澀靚仔,呢套劇亦都喺佢首次擔正做男主角,仲早過另一套成名作《天涯歌女》。劇中黎明飾演晉文公重耳,講述晉文公點樣喺重重難關下,成為晉國國君。

套劇好唔好睇就未知,不過一班黎明粉絲都可以懷緬當年後生靚仔嘅黎明。有興趣嘅觀眾,記得密切留意啦!