2019年香港票房十大 迪士尼Marvel撐起半邊天

一年之始,最適合嚟個往年總結。香港票房有限公司剛剛公佈咗2019年票房最高十大,中西片總票房比起2018年稍跌1.75%,錄得港幣19億2千幾萬票房,總數少咗幾千萬。中西高票房電影大多於2019年上半年上映,下半年票房受社會氣氛影響稍遜,尤其中小型、文藝類電影受影響最多,再睇埋票房分佈,不禁為香港影業抺把冷汗!

2019年整體票房全靠迪士尼、漫威出品撐起,十大最高票房非香港電影中包辦咗7套,其中包括最高票房頭4位,分別為首位嘅《復仇者聯盟4:終局之戰》($221,895,530)、第2位《反斗奇兵4》($88,537,419)、第3位《蜘蛛俠:決戰千里》($84,788,927)及第4位嘅《Marvel隊長》($76,043,088),4套已經佔咗2019年總體票房24.5%!

資料:香港票房有限公司

而其中分別排第5位嘅《小丑》($60,896,272)及第7位嘅《魔雪奇緣2》($55,345,274)繼續上映中,算係2019年下半年成績較好嘅西片。而排第10位嘅《狂野時速:雙雄聯盟》則錄得$37,350,103票房,遠遠拋離最收得嘅香港電影《廉政風雲 煙幕》嘅票房($31,360,754)一大截!

2019年首輪上映香港電影共46部,比往年再少6部,只佔總上映量14%,片量雖少而稱得上港產片嘅更少,所謂香港電影其實用「華語電影」形容更貼切。十大之中只有第5位《淪落人》($19,811,169)、第7位《恭喜八婆》($12,944,058)以及第8位嘅《如珠如寶》($11,109,229)算係港產片,其餘7部都係中港合拍片。

資料:香港票房有限公司

合拍片又以內地為主要市場,由於香港票房同內地票房差距實在太大,導致香港電影越嚟越唔香港,故事更靠近內地廣大觀眾口味,好似排第3位嘅《葉問4:完結篇》香港成績不過不失,暫時錄得過2,200萬票房,不過大陸好收得,收咗9億!

故事取向相信亦係影響香港觀眾入場意欲嘅主因,因為香港電影唔再香港,根本全部都係非香港電影,差在有無粵語配音。皆因9成都係外地片,唔難理解香港觀眾首選製作更成熟及精細嘅荷里活電影。

唯一例外就係過農曆新年,傳統節日睇中文片嘅興趣比較濃厚,十大香港電影中有4部都係2019年賀歲電影,分別為首位嘅《廉政風雲 煙幕》、第4位《新喜劇之王》($21,969,875)、第7位嘅《恭喜八婆》及第8位嘅《如珠如寶》。

受限於內地審批制度,好多合拍片都開唔成,好多電影幕後人員無工開,又返唔到轉頭拍港產片,試問邊個老闆有9億唔賺轉而投資幾百萬票房港產片?而香港觀眾來年只會更偏好本土味重嘅香港電影,對於業界嚟講確實步入寒冬。

今個農曆年男神黃子華會以《乜代宗師》再次出戰,即管睇下以香港為本嘅電影能否撐起票房!