2018上半年香港電影票房 10大港產片加埋都唔夠一套《復仇者聯盟》

嚟到7月,又係做個「半年結」。一齊睇睇2018年上半年香港電影票房成績,唔多講先睇睇外語片成績:

(數據由香港票房有限公司提供)

第1位毫無懸念由Marvel《復仇者聯盟:無限之戰》以1億5300萬票房,拋離對手成為上半年票房第一名,呢個紀錄怕且今年都好難被打破。第2位就係《侏羅紀世界:迷失國度》,收8100萬票房;第3同4位都係超級英雄片,分別由《黑豹》及《死侍2》奪得,第5位終於出現亞洲片,係韓片《與神同行》。頭5位最高外語片票房有3套都仲未落畫,繼續熱烈放映中,耐力驚人!

而上半年香港電影最高票房十大分別排名如下:

(數據由香港票房有限公司提供)

上半年最高票房嘅港產片頭4位,都係賀歲片。男神黃子華賀歲電影《棟篤神探》,收左4400萬成為冠軍。第2高收嘅係由劉嘉玲、任達華主演嘅《我的情敵女婿》,收左1700萬。第3同4分別係梁朝偉嘅《捉妖記2》同郭富城做孫悟空嘅《西遊記女兒國》。第5位係喺內地收億億聲、林超賢導演嘅《紅海行動》,收左800多萬。

外語片票房排名無咩驚喜,荷里活大片玩哂,最高票房幾位怕且攞全球不同國家條票房數出來睇都分別唔大。無他嘅,控制到上映日期,又控制到全球行銷,由海報、本地化片名連宣傳期都大同少異,特別近年Marvel系列玩彩蛋玩伏筆,吊你癮兼變相逼你睇,成功令全球觀眾中哂超級英雄毒,票房好似virus咁越滾越大!

10套最高票房外語片都有幾個共通點:第一,都係CG特技片!連唯一入到十大嘅亞洲片《與神同行》,都有非常多電腦特技,呈現陰間審判過程。

另外,大賣電影嘅類型都幾單一,唔係《復仇者》入面嘅「超級英雄」打Thanos,就係救世者打救世人,好似 《挑戰者1號》打機救朋友救低下階層、《悍戰太平洋2》同《末日困獸戰》又係保衛地球。個世界可能太凶險,大家非常需要被拯救!

香港電影方面,票房成績令人幾失望。頭4位都係賀歲片,得黃子華《棟篤特工》比較似樣,但係拋離《我的情敵女婿》咁多,冇咗以前賀歲檔嘅爭崩頭口水戰。

再望一望其他9套戲,香港味濃啲嘅,得毛舜筠攞金像獎最佳女主角嘅《黃金花》收到6百萬;劉偉恆執導、有著濃濃90年代香港情懷嘅《某日某月》,收4百萬(上映中)。咩叫香港電影?依家真係好難定義。

以其他7套電影為例,班底係有唔少香港嘅台前幕後工作人員,但又唔可能叫港產片,好似《捉妖記2》有朝偉、《紅海行動》有林超賢做導演,但非常明顯係拍俾大陸市場,拍完香港順手上埋,連排第7、由張家輝執導《低壓糟》,都有一半係內地演員!

如果票房數字等如真理,港產片真係唔多ok,10套最高收入香港電影,票房加埋都仲少過1套《復仇者聯盟》幾條街!