【Yahoo飛王】Swing告別演唱會 開完騷9年先有得睇

由Eric Kwok 同Jerald 組成嘅Swing(前身為Snowman)1999年出道,由於2位都係音樂人,所以即使專輯唔算多但hit歌都唔少。《1984》、《大大公司》、《帝國大廈》等等都仲係咁襟聽。呢隊組合喺2002年解散,2009年重組,到2011年舉行唯一兼最後嘅紅館演唱會後,再次分道揚鑣。

當時呢個演唱會只演一場,講明唔會出錄音錄影產品,真係一晚限定。當晚Eric Kwok仲向拍拖多年女友葉佩雯求婚兼即場行禮簽字,相當瘋狂!

除咗呢幕,同Eric、Jerald合作過嘅歌手都紛紛撐場,嘉賓陣容有陳奕迅、謝霆鋒、李克勤、林海峰、農夫、梁漢文等等。

近期好多音樂單位都將過去嘅演唱會放上網俾樂迷重溫,Eric Kwok都宣布會將《Swing後會無期告別演唱會》放上自己Youtube Channel開心share!

睇返介紹,呢個被「譽為」「史上最多朋友嚟幫拖、畫面最差、最衰聲、最肉麻、多謝得最多人、喺紅館開又冇出過DVD、講得最多無聊嘢」嘅演唱會,應該幾有娛樂性!

《Swing後會無期告別演唱會》

上線日期︰7月9日

網址︰https://www.youtube.com/channel/UCouNfhlJevShgCjvuWuu_rw