【2個女好搶眼】文雪兒登六避疫低調慶生

睇得又讀得書,係叻嘅!

喺劇集《黃金有罪》中飾演陳瀅媽咪嘅藝人文雪兒,天生童顏加上保養得宜,真係睇唔出佢今年「登六」踏入60歲,原本諗住訂幾圍枱約埋好友出嚟大搞慶祝吓,可惜撞正疫情肆虐,為咗大家嘅健康着想,最後無奈取消。呢日佢老公同兩位女兒安排咗海景晚餐慶祝補數,大女Christy仲親手整咗個生日蛋糕畀媽咪品嘗,氹到文雪兒勁開心,趁住生日,佢許願希望人人健康!

為避疫情,一家人簡單食飯幫文雪兒慶生。
文雪兒祝願人人身體健康。
戴罩影相有啲怪!
極速除罩影張相。

食完飯佢哋仲去咗尖沙咀星光大道行吓,趁住冇乜人嘅時候極速除低口罩影番張三母女嘅合照,佢哋拍埋一齊似足三姊妹,文雪兒嘅優良基因仲遺傳咗畀兩位女兒,佢哋都係眼大大五官標緻嘅靚女,除咗外表亮麗,佢哋嘅讀書成績都好好,大女Christy為土木工程師,細女Jennifer就係傳媒系,雖然條件咁優厚,不過佢哋曾經講過冇考慮過入娛樂圈,如果唔係,佢哋肯定會成為最矚目星二代之一。

左起:細女Jennifer、大女Christy