龔嘉欣買樓開舖未夠喉 爭做視后

東方日報
龔嘉欣希望演藝事業上再下一城,一嘗視后滋味!

一個30歲的女人,可能已談婚論嫁,好命的都做了母親、少奶奶,不過,現年30歲、堪稱「圈中小富婆」的龔嘉欣,有車、有樓、有舖頭,現時處於搏殺期,不甘心就此結婚生仔做少奶奶,揚言下一個目標是向「視后」進發。

龔嘉欣今年剛好踏入娛樂圈10年,坦言是一個關口。現時後生一輩,不少到30歲仍然一事無成,戶口得個「零」,她卻於這個年紀以900多萬買入人生第一層樓,以及在馬來西亞開火鍋店做埋老闆。女人,30歲可能已談婚論嫁,生兒育女,但嘉欣更喜歡工作,揚言下一個目標是攞視后。

壓力大到「停經」

年初,嘉欣買樓、開舖,她說:「我好怕搬屋,以前搬屋搬到喊,一路都想有個安樂窩,但唔容易,係有份壓力喺度,尤其是現時經濟咁樣,好多嘢唔喺自己控制範圍,盡力做好自己。」堪稱「圈中小富婆」的她公開儲錢秘笈,大爆由十多歲做模特兒開始,就有儲蓄半份糧的習慣:「我有兩個戶口,永遠只會用A銀行嘅錢,B銀行嘅錢我係唔會用,提款卡永遠唔帶出去,萬一唔夠用,先會喺A搣少少過去,我淨係鍾意儲錢,我唔識投資,我係一個好保守嘅人,有人叫我買股票,我唔買,只會擺定期,我又唔會有好大物質欲望,自己好少買衫買袋,一條牛仔褲着幾年。」

她指這個「30歲」不容易,在馬來西亞開火鍋店,坦言壓力大到3個月沒有經期,入行10年,令她成長不少,但她居然說:「其實我覺得呢10年我冇乜大改變,以前唔識諗咁多,依家會諗點可以再勤力啲。(負擔大咗?)今年30歲係一個關口,冇藉口再話自己係細路女,為人為自己都要諗多啲,我嘅事業由攞咗『最佳女配角』之後,應該要行上多一級。(有咩目標?)梗係攞視后啦!(《殺手》有冇機會?)呢部劇我付出咗要做嘅嘢,對得住自己、對手、監製。」

投入黎耀祥「父女戀」

嘉欣於現時熱播新劇《殺手》中飾演殺手,可謂搏到盡,她坦言拍前不知如此辛苦:「本身自己手腳唔係咁靈活,有啲動作要好努力去做,劇中同陳豪、黎耀祥好多對打戲,就算打到斷手指筋,全身瘀傷都唔識驚,幸運對手係祥哥(黎耀祥),拍攝時佢好遷就我,令我好容易投入到。」說到與黎耀祥年紀相差廿多年,劇中有段「微妙」愛情,問她能否投入?嘉欣說:「梗係投入到啦!我諗真係經驗!(父女戀喎?現實生活中接唔接受到?)應該唔得嘞!暫時我想像唔到,發生機會係好低。(未試過有呢啲『熟男』追求你?)梗係冇啦!我爸爸都係五十幾歲,對方大過我爸爸我接受唔到囉!做戲就OK嘅!」

問到情願拍喊到呼天搶地的戲還是打到落花流水?她說:「兩樣都好難,揀唔到,其實今次都好多喊戲,監製要求唔同咗,要嗰一下先可以喊,講完嗰粒字先可以流眼淚,我又做到喎!自己都有份交代,亦都成長咗。」

龔嘉欣
黎耀祥與龔嘉欣在《殺手》有段「微妙」愛情。