《龍咁威》下年開拍第三集 齊齊重溫第一二集經典場面

「龍咁威,特種警衛, 威猛我真勇毅……」 電影《龍咁威》絕對係谷德昭其中一個代表作!谷導仲話有意開拍第三集!而近日主角鄭中基更公開親自確認下年會開拍《龍咁威3》,仲話同谷導一齊執導,而鄧麗欣、張達明及李璨琛將會參與電影拍攝,計劃成為2020年賀歲片。消息一出唔少網民已經表示好期待,不如我哋一齊回顧下第一二集幾個經典場面啦!

《龍咁威》

白飯魚真係有白飯魚

由龍大雙(羅家英飾)創立嘅龍威體育用品公司,本年度旗艦級岀品 「白!飯!魚!」 一對只賣人民幣$19.9嘅白布鞋,竟然用左四川吸收天地靈氣嘅生曬白飯魚作氣墊膠囊,更能作為避震,抵受重擊!咩air max? 咩pump fury都要行埋一邊啦!

正正是步入警察學堂,龍威貪靚就係人都知,所以佢哋(加埋張達明飾演嘅黃金舟及李璨琛飾演嘅吳樹喜)嘅皮膚科醫生洗介賴亦提醒過佢地,只能用Duve或Luux,絕對不能用蝦世界,因為會起粒粒。至於髮型師狼狗就話佢哋頭髮好脆弱同好乾,就叫佢哋一定要用護髮素同唔可以吹頭囉。

容易襯衫呀嘛

佢哋三個有錢仔同鄧麗欣飾演嘅丁憫情去行咇,期間行過車行想買車,仲話呢一款車有14隻色,想一次想賣晒,因為容易襯衫。

必睇場口 -警信

唔駛多講,《龍咁威》fans一定明我講咩,因為成段警信都係咁爆笑!例如喺利用瑞士山區肺呃阿婆錢嘅案件重演,主持人鄭中基打扮成空姐。

《龍咁威2之皇母娘娘呢?》

可能知道大家鐘意睇《警信》,所以電影一開頭就搵佢哋三個做《警信》案件重演,今次鄭中基唔扮空姐,而係扮roller girl。

去皇母瑤池村浸溫泉

鄧Sir同埋佢哋三個去皇母瑤池村浸溫泉,點知中晒伏,入面得膠桶同吹氣泳池比佢哋浸凍嘅泉水。

唱山歌

因為大家姐(魯芬飾)鍾意龍威,所以拉埋兩個細妹去水邊洗衫。之後同龍威佢哋行過同發現佢哋三姊妹後,佢哋就唱山歌,不過龍威就唔係好領情,仲唱住笑魯芬喺三姊妹中最醜樣。

炸咗太公出嚟

佢哋話自己入村嘅時候太低調,所以要用大炮「振家聲」,點知將太公炸咗出嚟。除咗同太公玩殭屍先生跳之外,佢哋仲同太公玩執拖鞋同炸牛屎。最後原來太公已經炸到變灰,殭屍嘅真實身份係盜墓者人渣。

今次谷導確實咗會拍第三集,咁多位《龍咁威》系列嘅粉絲,相信你哋一定會又心急又期待,到時我哋一齊坐爆戲院,一齊棒場去睇《龍咁威3》啦!