齊齊播穿越劇 無綫《慶餘年》ViuTV《二月廿九》今首播

穿越題材劇集向來都有唔少捧場客,好多時都會掀起一股追劇狂熱潮。無綫就安排咗內地古裝穿越劇《慶餘年》喺今晚9點半首播,而ViuTV就安排咗愛情穿越劇集《二月廿九》同樣喺今晚9點半首播,兩台將正面交鋒,而家就同大家介紹下呢兩套劇究竟講啲咩啦!

《二月廿九》劇照

ViuTV全新愛情穿越劇《二月廿九》由《教束》班底導演黃智揚(Yellow)負責編劇、羅嘉駿(Steve)攝製及演員徐天佑、劉俊謙及吳海昕主演,劇情主要講述吳海昕飾演嘅女主角張麗紗(Yeesa)係一個喺2月29日出生嘅女仔,佢喺2017年2月28日幫自己慶祝生日,點知喺許願嗰一刻,佢竟然可以穿越時空,去咗北海道,兼邂逅徐天佑飾演嘅馬志浩(Ryan)同埋劉俊謙飾演嘅余家聰。之後,佢哋仲發生一連串奇怪嘅事及交織出一段三角關係。

《慶餘年》劇照

由孫皓執導嘅內地人氣劇集《慶餘年》正正與《二月廿九》一樣係套穿越時空劇,劇集係改編自作家貓膩同名小說,主要講述一個懷有秘密身世的皇子范閑(張若昀飾),佢經歷家族、江湖、廟堂等種種考驗,慢慢踏上成長之路。劇集演員陣容實力強大,有張若昀、李沁、陳道明、吳剛、辛芷蕾、宋軼及郭麒麟等等,劇集喺內地播出時已經引起迴響,唔少內地網民都大讚劇集要搞笑有搞笑,要嚴肅嘅時候都絕不馬虎。