【鼠年快樂】細數近年無綫賀歲劇

聽日就係大年初一啦,除咗拜年同逗利是之外,無綫每年都會準備賀歲劇陪觀眾開開心心過新年,我哋而家就同大家細數近年無綫賀歲劇!

《大醬園》2020年

由朱晨麗、何廣沛、龔嘉欣、吳岱融及龔慈恩等人主演嘅大醬園《大醬園》以醬油作題材,劇情主要講述一個大醬油家族萬家嘅恩怨情仇,當中仲有兄弟不和、爭產、兄妹亂倫等情節及夏小滿(朱晨麗飾)嘅身世之謎等等!

《大醬園》

《黃金有罪》2020年

《黃金有罪》以70及80年代香港為背景,再加上轟動一時嘅「佳寧案」作為題材。各人點樣為上位而努力,又係股票市場遇到嘅事,之後更涉及貪污案,榮木桐(張兆輝飾)更為咗錢不惜出賣親友而成為巨富嘅故事。

《黃金有罪》

《荷里活有個大老千》2019年

賭博恩仇劇《荷里活有個大老千》講1960年代香港賭博風行,更有門派以老千技術聞名。劇中請嚟好多老戲骨助陣,例如鄭則仕、秦沛、湯鎮業及金燕玲等等,一班演員演技大鬥法。

《荷里活有個大老千》

《波士早晨》2018年

《波士早晨》由李佳芯(Ali)、黃智賢及陳慧珊等人主演,劇集以辦公室政治為題材,劇情主要圍繞一班秘書同埋講述辦公室嘅求生之道,當中Ali飾演Roxie就係最索嘅一位。觀眾對劇集反應麻麻,但Ali就成為全套劇嘅焦點,佢嘅衣著到窈窕身材,成為觀眾熱門討論話題。

《波士早晨》

《財神駕到》2017年

《財神駕到》由黎耀祥、單立文、何廣沛、傅嘉莉、姚嘉妮及樊奕敏等人主演,劇集放喺新年檔期播出,真係十分應景。全劇主要叫人做個好人、好人一定會有好報等等。當中有搞笑位,亦有感人嘅地方。

《財神駕到》

《味想天開》2017年

《味想天開》中嘅丁一山(洪永城飾)係一個擁有金舌頭嘅鄉下仔,因呢個特殊能力,而受到了名廚蓋兆天(黃子恆飾)嘅賞識。丁一山仲幫蓋兆天研究新菜式,而佢亦成為一位著名的「金蓮花」食家。雖然劇集幾搞笑,不過唔少網民就鬧爆洪永城黐脷筋,話冇字幕聽唔到佢講咩。

《味想天開》

《乘勝狙擊》2017年

由陳展鵬、林夏薇、陳山聰、傅嘉莉及莊思敏等人主演嘅《乘勝狙擊》以賭博及懸疑做題材,講述賭王及一班老千爾虞我詐嘅故事。劇中更有岀神入化嘅魔術,亦有靚女主角大晒身材吸引觀眾目光。不過劇集出街後就惹嚟抄襲疑雲,被指與ATV劇集《勝者為王》及西片《非常盜》有唔少相似嘅地方。

《乘勝狙擊》

《公公出宮》2016年

劇集由黎耀祥、蕭正楠、陳國邦、曹永廉及胡定欣等人主演,以大清亡國作為背景,所有公公都被解散出宮,但佢哋一直以嚟以奴才身份生存。幾位末代太監喺假太監(蕭正楠飾)嘅幫忙下離開北平,誤打誤撞入咗金家做下人。因為一下子由紫禁城嘅公公做返普通百姓,佢哋要重新學習,當中發生好多趣事同鬧出笑話。劇情輕鬆又搞笑,曹永廉飾演嘅細雞,更加係深得觀眾喜愛。

《公公出宮》

《警犬巴打》2016年

由黃宗澤、鍾嘉欣及黃浩然等人主演嘅《警犬巴打》以香港警隊為題材,講述黎溢湫(黃宗澤飾)有一段不堪回首嘅童年,佢長大後就加入警隊做領犬員同埋佢同警犬拍檔「巴打」嘅經歷。而黎溢湫亦同獸醫馬志昊(鍾嘉欣飾)由鬥氣冤家變成情侶。

《警犬巴打》

《倩女喜相逢》2015年

古裝喜劇《倩女喜相逢》由薛家燕、蕭正楠麥長青、梁烈唯、滕麗名及湯盈盈等人主演,劇情主要講述書生寧采臣(蕭正楠飾)和二哥寧采君(梁烈唯飾)上京趕考,點知半途就用晒盤川,喺無奈之下住進蘭若寺,仲遇見女鬼聶小倩(薛家燕飾),聶小倩為咗幫佢地而鬧出一堆笑話。雖然劇情都幾搞笑,不過全劇最搶眼嘅係Ali飾演九尾狐。

《倩女喜相逢》

《新抱喜相逢》2014年

劇集由薛家燕、滕麗名、湯盈盈、敖嘉年及麥長青等人主演,劇情講述連氏企業觀大少連祉森(麥長青飾)及二少連祉傑(敖嘉年飾),分別於影視圈兩位姐仔郭菲菲(滕麗名飾)及文彩菱(湯盈盈飾)搞地下情,媽媽何少蘭(薛家燕飾)被逼無奈接受佢哋入門,之後三個女人都笑裏藏刀,鬧出唔少笑話。

《新抱喜相逢》

《初五啟市錄》2013年

《初五啟市錄》以民國初年作背景,由黃浩然、郭羨妮、陳錦鴻及林夏薇等人主演,劇情講述蘇飛(黃浩然飾)管理「永昌盛公司」,不過一班兄弟都係老弱傷殘,搞到生意愈來愈差。最後入不敷支被政府封埋舖。後來蘇飛就帶住一班兄弟黎到花地碼頭,接手「咕哩館」。

《初五啟市錄》