鼎爺中環餐廳被滋擾 黑衫大漢帶紙紮公仔上門追債

73歲李家鼎(鼎爺)縱橫演藝圈多年,自從同譚玉瑛拍攝飲食節目《阿爺廚房》,向一班觀眾重現失傳嘅家常菜之後就爆紅。拍電視、廣告、出食譜、賣節慶食品等工作接踵而來,前年更順勢由娛樂界殺入飲食界,喺銅鑼灣開埋私房菜,一圍難求。上年再同生意拍檔喺中環開新店,不過今日就有傳媒報道指近日鼎爺嘅中環食店俾人滋擾,有人竟然帶咗對紙紮公仔上門追債。

報道指事件發生喺母親節(5月12日),當日營業期間有十幾個身著黑衫嘅大漢,喺餐廳入面行嚟行去,大叫某人欠債還錢,當中有人拎埋一對寫住「譚XX」嘅紙紮公仔。不過爆料者就話除咗貴賓房嘅食客即刻埋單之外,其他食客都只係好奇睇熱鬧。跟住,呢班黑衫大漢就像一對紙紮公仔放喺門口,仲話唔準搞呢對紙紮公仔,所以侍應們都唔夠膽行上前同埋拎走佢啲。之後,黑衫大漢就離開。

事後接受傳媒查詢嘅時候,鼎爺就話佢唔知道,而家做緊嘢,唔方便講電話。