黑雨大塞車!林夏薇被困座駕3粒鐘

東方日報
林夏薇半夜收工時遇上雷雨兼大塞車,以為係幻覺!

藝人林夏薇近日忙於拍攝無綫新劇《七公主》,豈料開工不久便展開一連六日通宵拍攝,前晚收工更遇上「黑雨」大塞車!疲憊不堪的她塞足三小時才返到家,分享車內相到社交網並留言:「終於收工……但黑雨水浸……被困車中返唔到家,一陣又早廠……救命!」事後,薇薇受訪時說:「呢幾日拍主景,所以連生理時鐘都倒轉晒,每日早上收工,中午就起身返工。嗰時4點幾仲塞車,以為幻覺!塞咗三個鐘,返到屋企都天光,我只瞓咗半個鐘就再返工!」幸好老公每日化身廚師,為她炮製愛心便當及靚湯作支持,令她開心非常。

黑色暴雨下,早前宣布懷有第二胎的陳凱琳,被雷聲嚇得冇覺好瞓,她留言:「首先唔知道點解瞓瞓吓個人突然之間標冷汗,加埋個冷氣吹住令到個頭開始有啲痛。飲完杯暖水終於瞓番嘅時候,畀轟然的雷聲嘈醒咗,相信大家都聽到有幾咁厲害!再瞓番冇耐就到個背脊戚住戚住痛,可能係個肚開始大……雖然整晚都好唔舒服,但係叫自己唔好驚,不斷祈禱……」不少網友大呼好心痛。

陳凱琳留言指黑雨夜下被雷聲嘈醒,全晚瞓得差。