黎諾懿樂做金魚佬

東方日報
黎諾懿在家中教囝囝寫字畫畫,一於停課不停學。

新冠肺炎肆虐,學校停課,很多小朋友「焗」留家中,作為家長的星爸黎諾懿、區永權、莫家淦要諗辦法幫小朋友打發時間。諾懿每日安排不同節目,還到金魚街買蟹仔作實物活動教學。

黎諾懿每日要為留在家中的囝囝黎峰睿安排節目,會帶他到戶外呼吸新鮮空氣及活動一番:「帶阿仔出街會做足準備,戴口罩、潔手液不離身,我哋多數會去沙灘,畀佢玩吓沙,跑吓、運動吓。」停課不停學,諾懿指囝囝每日都有不同節目,他還特別買寫字架教囝囝寫字畫畫:「喺屋企會同佢傾吓偈,教佢讀書寫字,之後聽吓音樂同跳舞,郁動多啲。」

諾懿還去金魚街買蟹仔、魚仔等海洋生物,作實物活動教學:「等佢認識吓、接觸吓啲海洋生物,咩叫寄居蟹,要愛惜佢哋,就算唔外出,都可以學習了解。」

區永權活學活用

至於區永權(Albert)在小朋友停課期間,撞正菲傭回鄉後被禁止離境回港,他要暫任「姐姐」角色,打理屋企及照顧大仔區靖嵐及細仔區靖崋。他指兩子自動自覺做功課,更幫忙分擔家務,防疫期間Albert定期將水倒入U形渠位,兒子見狀即時學習,成為父子間的另類親子活動:「我哋每日都會倒半公升水落U形去水位清洗吓,起初係大人動手,小朋友見到好奇問點解,解釋完索性叫佢哋幫手,做完就讚吓,佢哋後尾睇到電視講倒水入U形去水位,就好有共鳴同好有成功感。」

莫家淦父子放風

育有兩子的莫家淦,因工作量減少,多了時間陪伴小朋友,他準備了多項活動包括桌上遊戲、跳舞學英文等「應付」大仔莫朗翹,父子倆偶爾出外「放風」:「帶佢去錦田俱樂部,踢波、放風箏、掘番薯,趁人少空曠,除低口罩呼吸吓新鮮空氣。」

黎諾懿教囝囝認識寄居蟹。
莫家淦兩父子放風箏放風。
區永權家居防疫變另類親子活動。