黎紀君唔抗拒異地戀越洋送上門

東方日報
黎紀君樣子甜美,一對美腿非常煞食。

模特兒出身的黎紀君自爆曾認識一位男仔5日,已火速撻着,以前戀愛大過天的她無視遙遠距離,即使要搭48小時飛機,都要飛到地球另一邊會男友。

周柏豪、連詩雅的師妹黎紀君(Christy)當年讀女校,甚少接觸異性,直至在一次聯校合唱團活動上終接觸男仔,才開始拍拖。她自爆初戀發生於中三:「我哋喺聯校活動識嘅,真係好純真,仲好記得佢覆我訊息覆得好快,呢樣我好鍾意,覺得呢個男仔幾好吖,咁就一齊咗,好簡單。其實當時我都唔知咩叫拍拖,覺得睇吓戲、唱吓K已經係。」

最怕悶男

Christy相信一見鍾情,試過最短一次認識男仔只得5日便一齊,她笑言:「我好少日久生情,鍾意一個人,7日就知o架喇,如果冇Feel,一個月都唔會有Feel。」其擇偶首要條件是性格相近,因男友會是她每日傾訴對象,若性格不合很難相處。自嘲有過度活躍症的她笑言:「我唔係好坐得定,所以唔會揀個太悶嘅男仔,我鍾意男仔有幽默感,起碼講到笑,氹吓我開心,(外形呢?)冇人唔鍾意高大靚仔,我都鍾意。」

她承認以前戀愛大過大,讀大學時曾有一段遠距離的感情,為了對方,她頻頻飛到外地:「我係完全唔理三七廿一就飛,嗰時讀書簽咗經理人做Model,有一、兩日假都會飛過去,好誇張o架!但依家真係唔會,等對方飛過嚟囉。」

踢拖出嫁

目前單身的她坦言未有拍拖念頭:「我覺得拍拖係一件好需要花時間嘅事,依家我最缺少就係時間,因為要打理蛋糕店,又想多啲幕前機會,所以想做好工作先。」小時候,她想過30歲必定結婚,如今會順其自然。有顆少女心的她一直不喜歡傳統婚禮,亦不愛穿高跟鞋,憧憬將來着拖鞋在泰國沙灘行禮:「我會好興奮囉!」

Profile

年齡:26歲

身高:1米68

嗜好:打機、整翻糖蛋糕

黎紀君坦言鍾意高大靚仔。
現時以事業為主,黎紀君不心急拍拖。