黎振燁接妻兒出院即蝦碌

東方日報
黎振燁護住老婆及囝囝離開醫院。

藝人黎振燁昨午冒大雨接剛分娩的太太及BB出院返家,黎太精神奕奕,而「黎小B」幾日人仔已聲如洪鐘,新手爸爸頓變「寵兒狂」!不過,他因攞漏藥膏而要折返,認真大懵!

黎振燁早前與朱智賢的「霧水情緣」令其事業發展煞停,遭無綫放入雪櫃,痛定思痛的他決定暫時將重心放於家庭上,除獲太太原諒外,日前更榮升爸爸,BB長相似足他,難怪深得黎振燁歡心!昨午黎太與BB出院,黎振燁早上已現身打點一切,離開時下滂沱大雨,一家人名副其實「風雨同路」。

據悉,黎太剖腹生產後健康情況良好,原本留院兩日已可出院,不過因為連日天雨關係,黎振燁寧願太太多留兩天,昨日獲醫生簽紙後,他急往找數,一切辦理妥當,即護着太太與BB落樓離開。他禮貌表示要先照顧妻兒,着記者稍後再聯絡他,而黎太全程點頭微笑,精神不錯,用黃色被包着的「黎小B」輪廓分明,於媽媽懷中熟睡。不過,這對新手爸媽相當大懵,乘的士離開後又再折返,原來攞漏BB用的藥膏!

事後黎振燁透過電話回覆說:「返咗我父母屋企坐月,太太餵母乳,不過BB食唔夠會加少少奶粉,我有幫手餵。其實我有兩個姨甥,有湊B經驗,依家抱B抱番夠本先得,話晒我等咗佢咁耐。」

囝囝聲如洪鐘大聲喊

談到改名,他表示未揸定主意:「依家叫住佢做囝囝同埋BB先。(好靚仔。)驚小器,要對住佢話醜怪呀!(喊得好大聲喎!)太太話佢聲如洪鐘,醫院全間BB房喊得最大聲係佢。(想BB點?)健康同快樂囉,呢兩樣嘢最寶貴。」又指兒子是爺爺嫲嫲第一個男孫:「所以我同佢哋講錫唔緊要,但唔可以縱。BB有幾個表姐同佢玩,不過待自己事業穩定後,我都想追多個,等佢有個伴。」

一家三口乘的士回家。
黎振燁事業煞停,未知其有份演出的劇集《食腦喪B》可有受影響?