黎巴嫩片《星仔打官司》內地爆冷大收3億

《復仇者聯盟4》票房爆就預咗,所以同期無人敢同佢鬥,片商通通讓路。不過早前喺香港上映過嘅黎巴嫩電影《星仔打官司》,居然喺內地成為黑馬!呢個情況好值得各大片商參考下。

內地《復4》上4月24日,唔係打到正但都算同期上映嘅新片(29日上畫)就有榮獲奧斯卡及金球獎最佳外語片提名,於康城影展,勇奪評審團獎及人道精神大獎嘅黎巴嫩電影《星仔打官司》,同由郭采潔同鄭愷主演嘅愛情喜劇《下一任:前任》。

《星》3月喺香港上映時,口碑好好仲有幾多傳媒力撐,可惜上映戲院數目有限,同礙於片種,票房有限未能引起廣泛迥響。

故事講述住貧民窟嘅12歲男童星仔,自小被逼輟學,在街頭拾荒養家,然而無恥的父母竟將妹妹賣給一個成年男人!為了向絕望的現實還擊,星仔計畫帶妹妹離家出走,可惜淪落街頭,生不如死。最後走上法庭,控告父母「把他帶來這世上」,卻生而不養。

《星》嘅目標觀眾同超級大片《復4》完全唔同,反而成功突圍,因為唔係人人都係Marvel粉,又總有人睇完大片想轉下口味,加上同期上映新片唔多,造就中小型片嘅空間。就係咁配合口碑,《星》喺內地五一長假期後開始跑出,錄得過億票房,截至13號,票房累計3億人民幣!

睇返金馬得獎作品《風中有朵雨做的雲》,有哂內地人氣演員都係收6400萬票房。其他超級英雄電影好似《沙贊!神力集結SHAZAM》同《死侍2》內地票房分別收2.9億同2.8億,《星》3億票房可以話係票房奇蹟!

內地觀眾對《星》咁有共嗚,同社會有好多識生唔識養嘅父母有無關係呢?