黃泆潼無綫發展平平 離巢轉行揚名國際

黃泆潼

無綫雖然係一個發掘唔少大明星嘅地方,不過可惜佢同時亦係埋沒好多才華人嘅地方,就好似演員黃泆潼咁。唔記得佢係邊個?望下個樣你就知架喇!

雖然佢已經息影咗10年,大家對佢印象唔深,不過佢近排喺社交網站寫:「昨晚TG帶走了婆婆。Tear gas took my grandma's life last night」。雖然呢個post好快就已經唔見咗,唔知佢究竟係已刪帖定係將帖子設定為只限朋友見到,不過就引起咗關注。不過更加引起關注嘅係原來佢離開咗無綫後,反而發掘到自己嘅才華,仲揚名國際添!

黃泆潼

黃泆潼天生麗質,不過佢自細由婆婆湊大,父母對佢缺乏照顧,家頭細務全部一腳踢,所以佢曾經接受訪問嘅時候坦言話覺得自己好似奴隸。黃泆潼喺16歲嘅時候被星探發掘做模特兒,曾經為譚詠麟MV擔任女主角,21歲參選港姐打入決賽,雖然落選,不過成功簽約無綫做藝員,其後影視圈兩邊走。

《龍咁威》截圖

雖然拍過唔少劇集電影,不過佢經常都係飾演巴渣潑辣嘅壞女人、又或者狐狸精等唔討好嘅角色,仲俾人稱為「御用八婆」。喺無綫冇得發圍,就唯有向外闖,08年佢決定離開無綫,因緣際會下認識咗DJ師父Ryan,學習混音技巧。後來憑著佢嘅天份同後天努力,而家化名Miss Yellow嘅佢迅速喺DJ界走紅,仲做埋歌手。曾經演唱歌曲《女殺手2005》、亦有同同農夫合作製作歌曲《派對獵物》。佢更加有機會搞埋世界巡迴,包括英國、法國、德國、北京及台灣等等。其後佢分別喺2013年同14年為世界級模特大賽做表演嘉賓、更加同格林美得獎隊伍Imagine Dragon同台演出。唔知睇完佢嘅故事,會唔會又引起小生花旦逃亡潮呢?

黃泆潼
黃泆潼