黃智雯搵后路博黎諾懿三連旺

東方日報
智雯危危乎企唔穩,黎諾懿即出手救美。

最近熱爆的黎諾懿,已連續兩年帶旺女拍檔攞視后,昨日黃智雯偕他宣傳新劇時,亦揚言想沾沾旺氣,有獎落袋,造就對方旺氣三連霸!

昨日黎諾懿、黃智雯、吳業坤、姜麗文與王卓淇等出席《街坊財爺》新生代爭霸戰,期間分組企在半圓健身球上玩「枕頭戰」,最後打成平手,齊齊罰飲苦茶。談到諾懿最近曝光率極高,又有劇集又有綜藝節目,他笑言之後想休息一會:「本身《C9特工》係緊接嘅,好彩抽起,唔使太密,驚人睇到悶。」他又表示有幾個獎想攞,包括節目主持、飛躍、視帝及螢幕情侶。

囝囝打同學

智雯聞言說:「諾懿成日話佢好旺女拍檔,希望可以沾下佢啲旺氣,唔一定係視后,乜獎都好。」諾懿即自誇連續兩年冇失手:「第一年係唐詩詠,第二年係李佳芯,今年都應該唔會失手,睇好你!」問到智雯可恨攞視后?她說:「今年仲未有耐,其實我都有幾套劇未出,所以未知。」諾懿即笑言簽多10年一定得!

問可想旺番自己?他說:「梗係想,我有抽獎運,但除咗錢之外,都希望攞吓名嘅嘢,演藝嘅獎。(威畀囝囝睇?)佢未識威,依家仲唔肯出門口返學,淨係想Swimming同食Sushi,佢仲畀老師寫咗兩次手冊,第一日唔小心打咗兩個小朋友,第二日仲係三個小朋友,老婆循循善誘教導佢,我都同家長講唔好意思,小朋友係有啲身體碰撞,最緊要唔好傷到重要部位,佢唔夠瞓啫,夠瞓就好乖。」

吳業坤增髮

同場的坤坤額頭附近有紅印,他自爆做增髮療程時整親:「有少少拔罐嘅感覺。(係咪好需要?)30歲要保養,唔好甩嗰陣先嚟做,啲人成日覺得後生有排未到,但都要好好保養頭髮,我依家少Gel頭,盡量戴帽。」談到劇集收視,他表示有24、25點:「好開心,我同姜麗文嘅感情線都幾得意,啲人都讚我成熟咗、靚仔咗,演技又進步咗!」

黃智雯、黎諾懿
王卓淇穿上短裙仔玩遊戲,依然姿勢滿分。
被姜麗文狂攻的坤坤,狼狽露底褲邊。