黃心穎怒起飛腳馬國明讚溫柔!

東方日報
心穎當眾起飛腳,嚇窒男友馬國明。

黃心穎與馬國明昨日為無綫宣傳新劇,心穎更作狀對男友拳打腳踢兼扭耳仔,盡顯霸氣,但事後她解釋只係為宣傳效果,現實生活中的她溫柔體貼,馬國明聞言亦大讚女友「夠晒溫柔」!

無綫新劇《宮心計2深宮計》演員胡定欣、馬浚偉、劉心悠、馬國明、蕭正楠、陳煒、黃心穎、謝雪心、羅霖、康華、張文慈等,以劇中宮廷服飾在沙田舉行「深宮倩影 華麗登場」宣傳,更先後以Catwalk出場,氣勢十足。

出外景分隔三星期

黃心穎扭着馬國明耳仔出場之餘,又作狀起飛腳,打情罵俏十分搞笑,心穎笑說:「我平時好溫柔(口架),初頭諗住含蓄啲行出嚟,但維持唔到兩秒,其實我哋為咗贏夾好咗。」馬國明則大讚女友平日好溫柔,並透露明日將到深圳為無綫劇《白色強人》拍三星期外景。心穎聞言笑指將要為新劇準備,沒時間都不會去深圳探班,以免阻礙男友拍劇。馬國明透露會帶備跑鞋北上,閒時會跑步Keep Fit,心穎取笑他坦蕩蕩地跑步。馬國明則笑說:「唔係,會着衫跑。」

胡定欣拉隊北上巡演

至於首次獨唱劇集主題曲的胡定欣,更與馬浚偉合唱另一首歌曲,兩人近日又出雙入對綵排舞台劇,隨後更到美加開騷搵銀。定欣笑言:「TVB係我經理人,馬仔都可以算半個。」問到無綫高層樂易玲聽到可會滴汗?馬浚偉說:「唔會,樂小姐依家同我感情好好。」定欣更希望觀眾喜歡兩人的情侶檔,令他們能趁機賺外快,與蕭正楠、黃心穎等唱得之人,齊齊到內地巡演:「我叫緊馬浚偉開音樂劇,我又跳過舞、又唱過歌畀佢聽,希望佢繼續用我。」馬浚偉說:「一定,嚟緊會好多合作。」

文:影視組

蕭正楠與劉心悠在劇中演一對。
胡定欣不斷游說馬浚偉開音樂劇,望對方帶挈搵銀。