黃宗澤換吓重口味欽點蝦頭談情

東方日報
睇嚟黃宗澤和吳卓羲見慣典型美女,所以對非典型美女別有遐想。

由黃宗澤(Bosco)及吳卓羲(Ron)主演的新劇《飛虎之雷霆極戰》收視報捷,台前幕後決定添食。Bosco及Ron更「欽點」楊詩敏(蝦頭)與陳嘉佳(細細粒)夥拍他們,又着苗僑偉找樂易玲(談情)!

Bosco、Ron、苗僑偉、陳山聰、劉佩玥、黎燕珊等,昨午現身電視城,出席《飛》劇宣傳。該劇首播錄得31.7點,成為自2016年起二線劇收視之冠,高層樂易玲宣布即將添食,開拍《飛虎3之壯志英雄》:「夏天開工,相信大家會辛苦啲。」苗僑偉即答:「有得開工唔怕辛苦。」

邀樂易玲出山

Ron及Bosco「艷福無邊」,活動上分別播出二人吻戲,Ron即打趣:「前面兩集都安排咗兩個女角畀我,嚟緊第三集3個女仔我都得o架!」二人受訪談到《飛虎3》女拍檔時,Bosco表示已知但「唔講得住」,又搞笑謂:「我配蝦頭,Ron配細細粒囉。」二人又補充:「叫三哥(苗僑偉)搵樂小姐(樂易玲)演出,係佢先搞得掂,夠晒噱頭呀!」

Ron全程行動不便,他解釋:「做運動深蹲踎傷咗兩條大腿筋,依家發炎。5日冇落過床,落得到床就用咗5分鐘、行兩條樓梯又用10分鐘。(邊個照顧你? )工人姐姐囉,好彩佢以前照顧過老人家,有呢方面經驗。」

黎燕珊口才勁

至於黎燕珊今次扮演議員,她坦言事前有睇片作參考,對角色大感新鮮:「今次好似口才好好,但真係冇諗過從政,淨係做演員好嘞。」

而苗僑偉對於好友梁潔華離世表示:「我同黃日華食咗個早餐,佢OK嘅,個女又生性。(同梁潔華交往最難忘啲乜?)我識佢兩公婆超過40年,以前我同華仔一條褲兩份着,仲成日笑佢有異性冇人性,睇得出佢好愛華女。呢年幾華女不斷進出醫院,又要食藥,依家可以話係解脫,人生就係咁,華仔都明白嘅。」

收視取得佳績,台前幕後士氣大振。