《鳳弈》首周收視不似預期 無綫仲有邊啲低收視劇集?

《鳳弈》

視帝黎耀祥有份演出嘅內地古裝劇《鳳弈》喺無綫正在播映中,劇情愈播愈緊湊,不過唔少網民認為劇集剪輯混亂、配樂唔夠古典及女主角何泓姍演技非常浮誇,所以收視一直偏低。喺最新一期嘅收視報告,《鳳弈》首周收視認真麻麻,只有17.8點。其實除咗《鳳弈》之外,無綫過往都有唔少低收視劇集,而家就同大家睇下有邊幾套啦!

《蘭花刼》平均收視:18.1點

2017年播出嘅《蘭花刼》,當時可以話係近十幾二十年低收視率嘅電視劇集,平均收視率可以話20都唔過。有三大花旦蘇玉華、田蕊妮及胡定欣坐陣,但因為拍攝技巧由4K高清變回低質素畫面,一眾師拉唔受落之餘,年青人都冇興趣睇。加上故事內容過份嚴肅唔夠輕鬆及大玩重口味,例如女子監獄霸凌、「曱甴飯」及「口水蛋」等等,難怪一班家庭主婦唔鍾意睇啦!

《巾幗梟雄之諜血長天》平均收視:20點

由黎耀祥及鄧萃雯主演嘅《巾幗梟雄》系列叫好叫座,但係去到第三輯《巾幗梟雄之諜血長天》女主角就換咗胡杏兒,冇咗鄧萃雯,唔少網民都唔太受落。劇中仲有大量重口味場面,導致播出無期,最後無綫該安排該劇喺myTV SUPER搶先播放,之後再喺翡翠台播放乾淨版!另外,劇集不斷出現穿崩位,真係睇到觀眾變晒「囧」啦!

《我瞞結婚了》平均收視:20點

唔少人都認為洪永城及黃翠如拍旅遊節目好過拍劇,不過佢哋就好快成功上位,之後仲成為唔少劇集嘅男女主角。本身佢哋嘅演技已經得唔到觀眾嘅認同,點知劇集仲要九唔搭八,就算今次由無綫金牌監製梁材遠親自操刀,都未能夠有收視保證。

《金枝慾孽貳》平均收視:20.6點

《金枝慾孽貳》令到《金枝欲孽》嘅神話宣告幻滅,雖然劇集搵嚟唔少重量級演員演出,不過唔少觀眾都認為劇集節奏太慢、角色太多太復雜、對白又長又唚氣,睇到佢哋難以消化及冇癮。就連主角鄧萃雯都表示好後悔接拍呢套劇,仲傳因為咁同無綫不歡而散。連主角都後悔嘅話,你話呢套劇集點會得到觀眾喜愛呢?!

《來自喵喵星的妳》平均收視:20.8點

劇集搵咗《鬼同你OT》原班人馬拍攝,由陳豪、田蕊妮及胡定欣主演,本應收視應該唔會差得去邊嘅,不過唔少觀眾都話頂唔順39歲嘅田蕊妮扮貓,加上佢演技太浮誇,令人反感。另外,亦有唔少觀眾認為劇名係抄韓劇《來自星星的你》,而劇情同埋人物設定就同《鬼同你OT》激似。

《冒險王衛斯理》三套平均收視:16點

由王晶擔任監製的中港合拍劇,分別有三輯《支離人》、《藍血人》及《無名髮》。由余文樂及胡然領銜主演,並由任達華、林家棟、文詠珊Janice Man、倉田保昭、伍允龍及苑瓊丹等人聯合主演。多當紅出名藝人理應好睇,不過《衛斯理》收視確實強差人意,因為有網民覺得今次嘅主角與倪匡嘅科幻小說角色有點格格不入及還原度低。