魏韵芝保錢途秘撈學整包

東方日報
魏韵芝跟師傅學整包,當然要試吓手勢。

歌手鄧紫棋(G.E.M.)的「未來姑仔」兼無綫藝人魏韵芝(Joyce),參與節目《東張西望》、《港生活.港享受》、《3日2夜》及《流行都市》等,但因工作受疫情影響,惟有創業搞小籠包生意,「秘撈」增加收入!

撈埋清潔

親力親為的她,跟師傅學整小籠包,見她搓皮時雞手鴨腳,不時問意見,放餡料更要「出貓」求救,花了10分鐘才成功包好一粒。據知食店仍是試業階段,整包技術有待改善的她轉戰做樓面,並化身清潔工抹枱及抹玻璃,又趁空檔外出掃貨,一口氣捧走4支大型消毒藥水,雖然笨手笨腳,但她堅拒假手於人。

搵G.E.M.試食

昨日她接受本報電話訪問,承認近日工作減少,有時間便到舖頭幫手,而小籠包生意其實是與媽咪及哥哥、即G.E.M.的造型師男友Mark合資:「媽咪做開飲食,佢啲朋友都好鍾意食我哋屋企秘製嘅上海嘢,咁啱之前睇啱舖,我同阿哥都有支持,夾咗少少!呢排生意難做,但舖頭附近有住宅同Office,希望做多啲外賣生意。(哥哥忙,主力你幫手?)冇話主力邊個,我呢排得閒,所以多啲落舖頭。」提到G.E.M.廚藝了得,會否請她試味畀意見?她說:「都會請佢,知佢煮嘢食叻,會交流吓,亦會請埋其他朋友,但要等舖頭Run順啲先。」

疫情下,魏韵芝親自出外買消毒用品。