高海寧長歎八個月帶父母出走

東方日報
高海寧祝福大家心想事成,最緊要身體健康。

藝人高海寧(高Ling)去年密密拍劇儲存貨,努力成果換來八個月悠長假期,笑言趁機做孝順女陪伴家人,有意帶雙親遠行放眼世界。高Ling今個新年留港做宅女,難忘童年時於南京度歲,放鞭炮、堆雪人、排住隊向長輩下跪斟茶(手豆)利是,如今只能在記憶中緬懷!

自去年完成無綫劇集《網絡騙案》後,高Ling便放長假,期間接拍旅遊特輯及搵真銀,預計至今年四月才開新劇。身為孝順女的她,趁這段時間多點陪伴家人,除了與父母一同返南京探望湊大她的婆婆外,還計劃與家人一起外遊,笑指對上一次與家人旅行已是中學時期。喜愛體驗生活的她,期待到西藏睇靚景:「趁父母後生帶佢哋去多啲遠地方,好似夏威夷或黃金海岸,又想去智利復活島睇幾舊石……不過佢哋未必有興趣,最後可能簡單去泰國算啦!」

團年飯食剩魚

談到過年,高Ling最難忘兒時於南京的熱鬧光景:「成個新年喺屋企前面放炮仗,好靚,以前南京落雪去到膝頭,到溶雪時就扯條冰當劍耍,香港就冇呢啲嘢玩。我家族傳統係年三十晚唔瞓得覺,代表祝福老人家身體健康,通常要早上先可以瞓,夜晚就成家人一齊睇春晚,十二點要叩頭,同公公婆婆拜年,之後就排隊攞利是,但利是只可以放枕頭底,唔可以用。」

來港生活後,雖然不用眼光光等到年初一,但仍有遵從習俗,年三十晚食團年飯時,不能把魚一吃而盡,要留待大年初一繼續食,以代表年年有餘,她說:「我都跟到足傳統,同埋會食水餃,好少出街,因為爸爸輩分最高,所以都係安在家中,等親友嚟拜年。」

祝和平唔怕娘

回望過去一年,高Ling坦言一直密密耕耘,喜獲不少觀眾認同及留意,寄望鼠年比豬年過得更好:「舊年係多事之秋,希望今年人人都可以開心,以前聽人講世界和平好似好娘,但今年係真心希望咁樣。工作方面,我仲有四套劇未出街,好期待播出後嘅反應。」

化妝:Stephen Lau\t

服裝:IRO<br>

髮型:Zap (Essensuals Toni & Guy Hair Salon)

長抖八個月,高海寧不忘搵外快,希望金銀滿屋。
香港過年氣氛愈來愈淡薄,令高海寧很懷念童年在南京的喧鬧日子。