駱胤鳴明年結婚冇錢唔生B

東方日報
駱胤鳴一臉幸福,依偎在男友的肩膊上影婚照。

組合樂印姊妹的28歲成員駱胤鳴,昨日在社交網宣布與拍拖5年的男友明年底結婚,並透露拍拖經過,當日因各自追求夢想而相遇,男友不計較她收入低,一齊捱快餐店。她自嘲至今雖然沒有成就,但男友仍為她感到自豪,相當感動。

冇正式求婚

她昨日受訪時透露婚期定於2020年12月27日,原本希望旅行結婚,但尊重長輩意願:「本來我想夜晚擺酒就算,依家會唔會做齊儀式都未知。(擺幾多圍?)未知,好多朋友呀,超級驚!麥美恩係我姊妹之一,但佢嗰段時間要返加拿大過聖誕,佢話26號趕飛機返嚟,我都驚佢Delay呀!」

她又稱與男友達成共識,無意生B:「養小朋友要好多錢,經濟係一個問題。」剛約滿無綫的她,除夕夜與家姐駱胤樺有倒數活動,之前又拍了微電影,經濟暫時沒有問題。問到未婚夫求婚經過?她笑言拍攝婚照當日,男友才記得仍未求婚:「係呀,佢仲冇講嘢添,擺明係道具,所以我唔滿意唔收貨!因為影相嗰日有少少超時,所以好趕,我又唔知求婚戒指戴左手定右手,佢都唔知。」提到比家姐先嫁人,她坦言感到不好意思:「好彩我唔係傳統屋企,希望我搵完幸福,家姐都早日搵到。」

駱胤鳴宣布由少女變準人妻。