馮素波祝福胡楓唏噓

東方日報

梁舜燕性格友善、隨和,在娛樂圈廣結善緣,不少圈中人對她的離世均深表哀痛,尤其是多位相識多年的老友及拍檔。

好友馮素波:「每個人都要走自己嘅路,我祝福佢,冇病痛離開係一種福氣,有病痛嘅話,離開亦係一個解脫。最後一次見佢係數個月之前,當時佢精神奕奕,話我行得快,我仲送佢返屋企。」

曾合作《真情》的劉丹:「知佢病咗一段時間,之前喺TKO撞過佢,身邊有兩個人陪住。我哋見到面仲會用《真情》嘅稱呼,我叫佢『上等親家』,佢叫番我『叉燒親家』。(有咩難忘事?)佢當年演上等人,真係花咗好多心思喺打扮上面,每次都用好多時間裝扮,係一位非常認真嘅專業演員。」

好友胡楓去年出席梁舜燕的演藝工作六十載暨壽宴,並送上甚具紀念價值的剪報:「好唏噓,由吳君麗開始,之後到夏萍、Lily,一個個咁走。」

《真情》中飾梁舜燕兒子的劉少君前日未能探病,昨日大感失落:「見唔到最後一面有少少遺憾,上星期仲計劃緊之後有咩活動預埋佢添!最後一次見面應該係7月左右,見佢幾精神,仲同個孫一齊做訪問。未試過一個藝人做我6年阿媽,呢份感情就係喺《真情》建立出嚟。

汪明荃:「我讀麗的訓練班嘅時候,佢教我儀態同化妝,我同佢女兒及已離世嘅細仔阮惠熊都好熟。我好佩服佢對演藝事業嘅堅持,敬業樂業,一向都好注重儀態,就算幾攰都唔會坐喺度瞓,好多嘢都好值得後輩學習。」