馮盈盈𢱑家品贊助幫未來老公慳錢

東方日報
馮盈盈冇橫財運,逢賭必輸。

前港姐冠軍馮盈盈與醫生男友搬新屋同居後,變得知慳識儉,昨日她宣傳新劇時,不忘𢱑家品贊助,認真老實不客氣。而王浩信近年勤健身,其心口脹卜卜,他笑言若新劇收視理想,不介意騷肌分享。

王浩信、馮盈盈、陳敏之和張頴康等,昨日出席無綫台慶劇《解決師》的宣傳活動。早前馮盈盈宣布與男友鍾文浩過同居生活,被指為做「醫生太太」出招,努力𢱑贊助,幫未來老公慳荷包,她笑言:「我好歡迎贊助商送畀我嘅禮物,一齊宣傳做到雙贏局面,加上我近排搬咗新屋,好多嘢要買。我覺得慳錢係美德,唔係為咗儲嫁妝,出嚟生活經濟壓力好大,所以一定要學識節儉。」

摸頂入市 自嘲明燈

她透露男友負責供樓,她則負責水電煤及日常生活開支,故唔怕醜開聲𢱑贊助:「我想要個電飯煲,同埋就嚟冬天,想要部暖風機,冷暖加空氣淨化,三合一最好,夠環保。」另外,她前晚錄影節目時自嘲「明燈」,過大海賭錢試過輸清光:「最高紀錄輸3,000蚊,玩老虎機咋! (投資呢?)投資涉及風險,我好謹慎,不過房地產方面,舊年我12月摸頂入市,真係好黑o架!(男友怕咗你?)我有提醒身邊朋友,有咩想買記得買我對家,但贏咗最好分番啲畀我。」

陳敏之霸氣鬧仔

至於王浩信身形比前健碩,他稱之前拍《飛虎》已開始健身,笑言現時胸肌接近40吋:「如果收視好會同大家分享。」並期望能承接《金宵大廈》的好收視。而陳敏之透露飾演一名管理黑幫生意的CEO,充滿霸氣,試過將「霸氣」帶回家,粗聲粗氣鬧兒子,令囝囝不開心扁嘴。又稱一向被兒子「食住」,老公則較惡:「老公先係真正屋企嘅『解決師』。」

王浩信(左)於活動上使出真功夫。
張頴康(左起)、王浩信、陳敏之與馮盈盈,對新劇收視充滿信心。