馮盈盈陳庭欣台慶玩抹窗

東方日報
盈盈以短褲仔晒長腿,預告台慶夜亦會性感登場!

多位歷屆港姐昨日為台慶綵排,師姐級的陳庭欣及馮盈盈為提高記憶力,竟自創搞笑舞步,以「抹窗」、「攞嘢」等動作當口訣,並命名為「家務舞」,笑爆全場!

陳庭欣、馮盈盈、張寶兒及蘇韻姿等歷屆港姐齊集電視城,為明晚舉行的台慶綵排舞蹈,屆時眾女將分別以高貴打扮載歌載舞,當中盈盈與庭欣更預告會性感登場!二人透露已練習一星期,由於舞蹈根基不算好,為免成為「豬隊友」,只好自創舞步口訣。

盈盈說:「我想練舞時生動啲,咪將日常生活擺落去,好似家務舞咁,有啲動作好似抹窗同攞嘢,練習時叫口號囉!同埋我哋會喺樓梯好優雅咁行落嚟,睇吓會唔會加插仆倒嘅動作,令到件事精彩啲!」庭欣即說:「我行你後面,到時真係要睇吓。不過我哋都好優雅,加上我件晚裝成8磅重,『抹窗』動作唔舉得太高。」二人更即席表演一小段舞,邊跳邊講口訣,相當爆笑!

張寶兒獲准性感

至於寶兒與蘇韻姿繼3年前參選時再合作,寶兒說:「好在啲舞步好簡單,只需要表現優雅一面。(戰衣好性感?)畀男朋友審批咗,一定冇上次咁性感,盡量表露我身上嘅優點,缺點就收埋囉!」至於蘇韻姿還有一Part單簧管演出,晚晚練到半夜,擔心被鄰居投訴。

除一眾港姐外,王君馨、高海寧與張曦雯將帶領大班藝員跳三段不同種類的舞,當中高海寧跳絲帶舞,張曦雯玩空中呼拉圈,王君馨則跳鋼管舞,由於有不少跪地動作,以致膝頭受傷,君馨說:「我哋隻舞又要揈頭髮又要一字馬,最多就係跪地動作,所以頸、腰同膝頭都扭傷。」

盈盈(左)與陳庭欣示範自創的「家務舞」,果然似抹窗!
張寶兒(左)與蘇韻姿自嘲主力Sell優雅。
王君馨趷Pat起舞,練到周身傷。