馬米高大爆拍戲時受盡人情冷暖 滕麗名呂慧儀最大嫌疑:嘴臉猶如劇中八婆角色

馬米高

馬蹄露姪仔馬米高喺無綫做咗7年,不過認得佢嘅人絕對唔多,馬米高前幾年做埋KOL喺網上教英文亦吸引唔到太多粉絲,之後推出《跟著姑姐去登台》系列短片,又講下社會議題,點擊率終於上升。近排馬米高又有新搞作,就係推出新書《英文寫真》,書中有兩個章節《娛樂照妖鏡》及《Seafood看人低》中講述佢拍戲時受盡嘅人情冷暖,當中馬米高表示親身經歷兩位人氣女星狗眼看人低,更指佢地蝦新人,雖然冇開到人名,但大家都估係滕麗名同呂慧儀!

滕麗名

馬米高以“ Old Seafood”嚟形容一名資深女星,為咗張“公用凳”露出八婆嘴臉。馬米高話有次去客串拍劇,喺現場見到張無貼名字嘅凳,突然俾“ Old Seafood”見到即刻同化妝師講你唔坐,搞到被人坐。嗰刻佢諗明明睇清楚冇寫名, 但又擔心係私人凳,所以佢即刻彈起講唔好意思,之後化妝師同佢講唔緊要,不過“ Old Seafood”仲要加多句話下次自己坐,唔好俾不知名嘅人坐。馬米高形容當時“ Old Seafood”嘅嘴臉猶如劇中八婆角色。

呂慧儀

馬米高另一個經歷就係 “Old Seafood”同劇搭檔,馬米高就被佢嘅橫行霸道行為所震懾。馬米高幫依個人改咗名做“海產”,因為佢鍾意鬧新演員,又經常導演上身,擅自刪掉新人對白;仲會監場睇其他演員演出。但馬米高指圈中都有唔錯嘅藝人,好似陳豪同王祖藍,佢地會提攜後輩。

馬米高
馬米高