馬德鐘孝順仔伴奏「樂」享幸福早餐

東方日報
兒子即場彈鋼琴,馬德鐘聽幾多次都唔會厭。

視帝馬德鐘的兒子馬在驤被譽為矚目星二代,外形出眾、性格暖男,懂拉小提琴、鋼琴又會整甜品。原來父子私下角色對調,馬德鐘不用嚴管兒子,反被對方管束!父親節將至,他坦言不需要禮物,因每朝聽着兒子以「鋼琴伴奏」享用早餐已感幸福。

馬德鐘(Joe)與年屆22歲的馬在驤(Xiang)無論氣質、身形相近,兩父子早前一同受訪時,一套西裝拆開西裝褸、西褲分開着,原來平日也會交換衫穿,十分老友,Joe說:「由細到大,我覺得同佢好老友,可能我主觀願望,我哋鍾意睇戲、講戲,從來冇嘈交。」Xiang亦認同:「我哋都幾好朋友,會想同佢玩小提琴合奏,合奏巴哈二重奏。」期間興之所至哼出名曲,Xiang還即場彈奏一段鋼琴樂曲!

Xiang自小具音樂天賦,擁有八級小提琴資歷外,鋼琴與自學結他亦達高水準,Joe說:「我覺得受電影嘅影響!我哋鍾意有關彈琴嘅電影,佢覺得音樂好聽就想彈出嚟,所以『家長指引』睇乜嘢戲好重要!」每朝早兒子都炮製「鋼琴伴奏早餐」,Joe說:「其實佢每朝食完早餐就去彈琴,我同老婆一路食一路有琴聲伴奏,呢個感覺好幸福!唔使話咩父親節送禮,每日係咁已經好好,好似喺酒店食早餐。」

兒子有意入行 抱開放態度

外剛內柔的Xiang原來還懂得入廚,記得兩年前父親生日,親手炮製朱古力蛋糕慶祝,Joe還爆出暖男另一秘密:「我唔會管佢,因為佢好自律,反而佢管我多啲!(點管你?)叫我食埋啲嘢、唔好食咁多、早啲瞓啦呢啲……(你聽教?)我OK,哈哈!好建議會聽,無論乜嘢年紀都要進步。」

過往放假返港,Xiang試過行騷及出席品牌活動,對拍電視及電影亦感興趣,問到畢業後正式入行?他說:「可能會喺澳洲攞牌做工程師,但唔知自己係咪鍾意,另一個選擇可能發展模特兒、拍戲。(做暖男角色冇難度?)想做反派,型啲!」Joe坦言對Xiang入行亦抱開放態度,絕對支持兒子的選擇。

似朋友多過似父子,還會交換衫着!