馬家強勢回歸! 飲食節目《馬家開飯》下個月有得睇喇

無綫處境劇集《愛.回家》長做長有,嚟緊新一輯《愛·回家之開心速遞》將於2月20日首播,好可惜大家鍾意嘅馬家淨係得「馬虎」劉丹有份參演,呢個消息一出已經令到好多觀眾失望。

可能無綫聽到大家嘅迴響,雖然佢哋冇份拍新一輯《愛·回家》,但係就安排咗「馬家」成員拍攝飲食節目《馬家開飯》,到時佢哋會去各區「掃街」,帶大家四圍搵食。

有指節目將會喺2月4日首播,喺新年期間見到馬家又講又笑嘅温韾畫面,網民知道消息後都表示支持,不過如果有埋徐榮囡囡「馬家好」就更加好啦~

其實廚藝了得嘅李家鼎都有份喺《愛.回家》演出,飾演馬強夜冷店嘅員工洪爺,唔知到時會唔會客串返一兩集呢?