馬國明買樓防婆媳糾紛恨攞視帝帶挈吸金

東方日報
馬國明預告新年會帶黃心穎見家長,仲計劃買樓避免婆媳糾紛。


無綫視帝、視后即將誕生,「民間視帝」馬國明憑劇集《降魔的》深入民心,劇中演員更齊齊拍片作最後拉票、集氣,馬國明坦言有信心之餘都要視乎當晚的運氣,又揚言最想搵多啲錢,實行攞獎、搵銀、買大屋娶老婆,咁就最完美!


無綫《萬千星輝頒獎典禮》將於後日隆重舉行,今年視帝、視后頂頭大熱之選有馬國明、王浩信、宣萱、李佳芯及唐詩詠,觀乎最近的走勢,視帝方面以受盡觀眾、網民歡心的「民選視帝」馬國明最有機會,他憑劇集《降魔的》提名,而此劇播出時不論口碑及收視都相當理想,於網上民間選舉中,馬國明更已成為網民心目中視帝,此劇亦成為網民心中的「最佳劇集」。眾演員更齊齊拍了一條《降魔的之攪咩鬼習作》片再拉票谷氣加持,團火仲(興)緊。


為娶妻生仔打算


馬國明接受專訪時坦言很高興成為民選視帝,他說:「始終台慶嗰晚係咪真係攞到都要加啲運氣,始終公司個獎唔係網民投票,仲有好多Party投票。」經常謙稱攞獎平常心的他坦言:「我唔係冇鬥心,我只係想搵多啲錢!呢五、六年我開始清晰自己想要乜嘢,唔係淨係話想要攞咩獎,係想一家人生活好啲,同埋為將來娶老婆、生小朋友打算,我2016年買咗樓,但想將來父母有間屋,我自己家庭有間屋,始終驚婆媳糾紛!(驚黃心穎同伯母唔夾?)未有機會帶佢畀媽咪見,新年睇吓有冇時間啦!我感覺佢哋應該OK,阿媽係易相處嘅人,但正所謂『相處好,同住難』,各有各嘅空間就最完美!」


馬國明出名孝順、重家庭觀念,更會得人恩果千年記,他揚言感激許紹雄教導:「記得我訓練班出嚟試過做許紹雄個仔,成日被佢用粗口鬧!我以為都已經背晒對白啦,但喺前輩眼中咁叫做晒功課?其實佢可以行開飲茶,點解要拉你埋一邊,袋錢入你袋?我好多謝佢鬧我。」


而在拉票片中,黃智雯、何遠東、胡鴻鈞及蔣志光等表現落力,齊齊做晒撻車匙、校倒後鏡、扣安全帶姿勢,智雯更扭腰晒舞技,連「天然呆」的馬國明及其他演員都受感染齊齊舞起來。智雯說:「嗰日到場用咗15分鐘準備就拍,段舞嘅靈感來自我嘅跳舞老師,拍片前一日我去咗上堂,所以聽到《到此一遊》首歌嘅Beat,就即時聯想到老師個Routine跳囉!(想拎最佳劇集?)有就梗係開心啦!(期待續集?)好期待,因為結局都留晒伏線。」


冧師奶粉絲投票


至於《降》劇監製方駿釗坦言因應之前的民間網上選舉,故答謝網民支持,說到他們集氣望拍續集,他說:「全盤計劃編審係真係有諗過,但要公司落實同詳細計劃。(奪最佳劇集?)一定有機會。(有冇信心馬國明攞埋視帝?)呢個信心更加大,佢真係好能夠感染到觀眾情緒,搞笑又得、催淚感人又得。」


此外,馬國明日前與胡鴻鈞、何遠東現身將軍澳一個商場排隊買咖啡,隨即被一班粉絲認出包圍爭相合照,三子有求必應,順道向粉絲拉票。期間,馬國明電話響唔停,幾位師奶粉絲見狀,先找胡鴻鈞和何遠東拍照,直至馬國明放低電話即急急拉着他。馬國明當然識做冧得一班師奶粉絲笑到見牙唔見眼,影完合照拉完票,三子步往附近酒店各自取車離開。


文:影視組


攝:秦健輝、追蹤組


<!--AD--><div class="footerAds clear">第一手消息請下載on.cc東網<a href="http://itunes.apple.com/hk/app/id349812998?mt=8" target="_top">iPhone/</a><a href="http://itunes.apple.com/hk/app/id387862928?mt=8" target="_top">iPad/</a><a href="http://market.android.com/details?id=com.news.on" target="_top">Android/</a></div><!--/AD-->

原來許紹雄曾爆粗鬧馬國明,塞錢入佢袋!
馬國明日前與何遠東出巡,被女粉絲包圍合照,「民間視帝」當然最受歡迎。