馬國明破宿命稱帝 惠英紅超班封后

東方日報
惠英紅力壓楊千嬅等勁敵,憑《鐵探》封視后。

新一屆視帝、視后出爐!深得網民熱捧的馬國明提名12次,終於首度贏得視帝寶座,得獎時繼續其招牌天然呆!演技超班的惠英紅大熱封視后,而周柏豪奪男角色獎,李施嬅及楊千嬅則雙雙奪女角色獎。

無綫《萬千星輝頒獎典禮2019》昨晚在將軍澳電視城舉行,一眾小生花旦盛裝到場,全晚共頒發十四個獎項。今年「最佳男主角」競爭激烈,入行逾20年、現年45歲的馬國明終憑《白色強人》開齋奪視帝!他得知賽果後繼續招牌「天然呆」,全場拍爛手掌,其後獲兩位兄弟林子善及黃嘉樂推上台,從幾位前視后胡定欣、唐詩詠及李佳芯手上接過獎項,馬國明呆完一輪才說:「今年真係嚇親!我首先多謝大家反應!就算冇獎我都當贏!我今早出門,我阿媽話中到就發,我話中都要做,佢話八千幾萬呀!今年咁多強對手,可能我係有運,遇到《白色強人》。」又多謝TVB監製、高層、傳媒及梳化服。馬國明在《白》劇中飾演情深醫生唐明,過往提名多達12次,但仍跟視帝一獎擦身而過,幸好在大批網友集氣下,終揮低勁敵陳山聰、袁偉豪及周柏豪。

周柏豪掃兩獎感不適

至於「最受歡迎電視男角色」由周柏豪奪得,憑暖男角色贏得不少女觀眾芳心,他在台上說:「空白一片,多謝觀眾!」緊張得停頓一輪再說:「可能發緊燒!多謝入行十幾年幫過我嘅人,其實開頭自己對呢個角色冇咩信心,係監製陳寶華畀好大信心,話我可以嘅,所以佢最大功勞。」另他唱出得獎主題曲後一度不適,事後要人攙扶。

「最佳女主角」同樣緊湊,賽前被視為《鐵探》惠英紅、《多功能老婆》楊千嬅及《金宵大廈》李施嬅之爭,最終由三屆金像影后惠英紅首次奪得視后,獲全場祝賀的她繼鄭裕玲後,成為第二位集影后與視后於一身的女藝人,她說:「原來真係緊張過金像獎!好開心、好感恩,十年冇返香港拍劇,一拍就有好劇本,我喺TVB出身,如果廣大觀眾唔嫌棄,我會拍多啲劇,我接拍嘅劇本都係高水準嘅。」

《白色強人》膺最佳劇集

而「最受歡迎電視女角色」由李施嬅及楊千嬅一同得獎,施嬅說:「今年有兩位影后級對手,真係好刺激!其實上年4月3日完約後,都冇諗可以企喺度攞獎,相信只要付出努力,畀人彈就增值自己,畀人踩自己爬番起身,用正面態度,去到邊都可以捱出成就,嚟緊我會去加拿大拍劇,我會用一萬分努力唔會令大家失望。」千嬅則說:「開心遇到好劇本,好感動!呢個劇係表現女性精神,拍完後人生都好多反思,做女人、媽媽、太太都唔易,遇到問題都可以好強大。呢個劇看似愛情劇,多謝拍到我有一顆少女心同童顏!」

另外,「最受歡迎電視拍檔」由陳山聰及李施嬅憑《金》劇奪獎,兩人即興以角色腔口互相道謝。「最佳劇集」則是《白色強人》。

馬國明提名12次終於奪得視帝!
楊千嬅與李施嬅齊齊贏得最受歡迎電視女角色獎,大家歡喜!
李施嬅與陳山聰拍住攞最受歡迎電視拍檔。
柏豪有兩獎落袋,包括最受歡迎電視男角色。