馬國明獅城封視帝《萬千星輝》叫胡

東方日報
馬國明首次於新加坡攞視帝,最開心當然是一班粉絲!

藝人馬國明早前因黃心穎搭上人夫而甩拖,愛情失意,但事業卻更上一層樓。前晚他憑無綫劇《白色強人》首奪新加坡視帝,打破七年來的「陪跑」宿命,亦為明年初舉行的無綫台慶頒獎禮更添勝算!同樣憑該劇封視后的唐詩詠,更直言最想就是對方奪獎,如今如願以償!

馬國明今年的心情猶如坐過山車一樣,今年4月,黃心穎被爆「偷嗒」歌手許志安,令他經歷了「男人最痛」,戀情亦畫上句號。不過,與黃心穎分手後,不少網友都指馬國明「有運行」!向來自嘲沒有抽獎命的他,日前於台慶贏得獎金後,前晚於新加坡出席《星和璀璨星光夜2019》,憑劇集《白色強人》勇奪「2019星和最佳TVB男藝人」獎,首次於新加坡捧走視帝獎座!

過往只曾憑《On Call 36小時》於2012年奪過馬來西亞視帝的馬國明,多年來都是「視帝陪跑專業戶」,今次事隔七年終於再稱帝,可喜可賀!而明年1月舉行的《萬千星輝頒獎典禮2019》,視帝之爭相當激烈,除了《白》劇拍檔郭晉安,還有話題劇《金宵大廈》的陳山聰以及《解決師》的王浩信等,如今馬國明在新加坡先拔頭籌,為爭獎打下強心針!他說:「要多謝《白色強人》監製、編審以及整個團隊,唔知係咪人大咗,演戲愈耐,愈覺得成個團隊嘅力量比個人力量更重要,仲有一班協助我哋拍攝嘅醫生、護士,冇佢哋,我哋嘅專業感都冇咁強。總之,團隊威力係我拍呢套劇最深刻嘅感覺。(今次攞獎會否對台慶頒獎禮稱帝更有信心?)分開兩件事嚟睇,每一個頒獎禮嘅評審標準都唔同,隨遇而安,盡咗力喇!」

講「老婆」唔提舊愛

對於劇中「老婆」唐詩詠封后,馬國明說:「開心!李佳芯都有攞獎,呢個劇攞乜嘢獎都好,我都非常開心!」又表示最希望《白》劇能於台慶頒獎禮奪「最佳劇集」獎。至於問到舊愛黃心穎有否送上祝福?他即表示不作回應!

唐詩詠興奮奪視后

出爐星洲視后唐詩詠,對於劇集於《星和》掃獎甚為高興,尤其馬國明首奪視帝,更令她「開心過自己攞」,她興奮地說:「梗係要馬國明攞獎!我哋合作嘅時候,冇諗自己有冇(獎),只係好想佢攞到獎;今次除咗佢,仲有其他人,好似Fred(鄭俊弘)都攞主題曲等,都係好開心!」此外,擔任頒獎嘉賓的薛家燕亦獲頒「2019愛心大使」獎。

另外,唐詩詠與王浩信主演劇集《解決師》剛播出大結局,劇中二人未能終成眷屬,唐詩詠更難逃一死,不少網友傷心得直呼不能接受。對此,唐詩詠開心劇迷睇得投入,證明演出獲關注,又表示:「我已經習慣咗Sad Ending,當然,唔希望角色會死,好似帶唔到歡樂畀大家,但拍嘅時候都冇諗過觀眾會接受唔到,呢樣嘢幾意外。」

晒靚肩的唐詩詠,奪視后喜上眉梢。